Footer

EDITORIAL: Ti sabali a dios ni Filipino

Naipanurok a mannugal ni Filipino. No ukagen ti pakasaritaan, addan dagiti sinurat a mangdakdakamat dagiti paglinglingayan ni Filipino a maibilang a sugal kas iti tadi ken loteria. Kinapudnona, adda napalabsanmi iti napalabas a sinurat a nangabak iti dakkel ni Dr. Jose Rizal, ti nailian a bannuar a Filipino, iti loteria ket daytoy ti inaramatna a pinagbangon iti klinikana iti Dapitan a nagagasanna kadagiti agindeg sadiay.

Saan a nakaskasdaaw nga adda dagiti sumagmamano a tattao a nanggundaway iti daytoy a pagkapsutan wenno bisio ni Filipino ket naipasdek dagiti illegal a sugalan a kas iti hueteng, loteng, masiao, ken dadduma pay a numbers game. Uray ti gobierno, adda dagiti tartarawidwidanna a numbers game kas iti sweepstakes ken lotto.

Ngamin, iti pammati ni mannugal a Filipino, daytoy ti kadarasan a panguartaan wenno bumaknangan.

Nagbalin ti sugal a paset ti biag ni Filipino uray iti baet ti panangkontra ti simbaan iti amin a kita ti sugal a kunana a mangipapaay iti palso a namnama kadagiti agpuspusta nangruna dagiti marigrigat.

Itay nabiit, impeksa manen ti simbaan ti panangkondenarna iti pannakailasag ti sugal kadagiti tattao ken iti panamatida a mangabakda babaen ti bendision ti Namarsua.

Kinondenar ti CBCP-Episcopal Council ti isusuknal dagiti tattao iti simbaan tapno ikararagda iti panangabakda iti lotto.

Segun ken ni Bishop Deogracias Iñiguez, adda payen dagiti sumrek iti simbaan nga iggemda ti card a nakaipalaonan ti pinustaanda a numero sada iyapros-apros iti rebulto dagiti santo ta mamatida a babaen itoy, mapagasatanda a mangabak.

Kinuna ni Iñiguez a maikontra daytoy iti kinakristiano. Saan a maikanatad agsipud ta ni kristiano saan nga agpannuray iti sugal tapno bumaknang wenno dumur-as ti biagna. Iti pudpudno a kristiano, agsammaked iti bukodna a kabaelan ken  ipundarna ti masakbayanna babaen ti panagsalukagna ken babaen ti pamendision ti Dios, saan a babaen iti abakenna iti sugal.

Kastan ti pannakairemrem dagiti Filipino iti sugal, uray payen ti Dios, kaptanda tapno laeng mangabakda. Ngem dida kadi maamiris a no patgan ti Dios ti kararagda, kasla met laengen ipamatmat ti Namarsua a supsuportaranna ti sugal ken sappuyotenna ti palso a namnama dagiti agpuspusta?

Nakaladladingit a kastoy ti nagbanagan dagiti kailian gapu laeng iti sugal. Nalawag a pammaneknek a gapu iti sugal bimmaban ti moralidad ni Filipino.

Kenkuana, nagbalinen a sabali a didiosen ti pirak, maikadua iti Namarsua kenkuana.

Ay-ay pay ni Filipino.#