EDITORIAL: Ti Umuna Nga Aldaw Ti Klase

Panagseserrek manen ti klase para iti tawen 2013-2014!

Manamnama ti pannakaipatungpal dagiti annuroten ti Oplan Balik Eskwela Program babaen ti pannulong ti Parent-Teachers Community-Association tapno naannayas ti wagas ken maliklikan dagiti aberia a mangited iti saan a nasayaat a pagteng.

Umanay met ngatan ti makalawas a panangisagana kadagiti pagadalan sakbay ti idadateng daytoy nga aldaw, no kasano a sanguen dagiti nadadagsen a parikut iti basic education program.

Kas iti kapaliiwanmi, napasnek met ti DepEd a mangsolbar iti panagkurkurang dagiti siled pagadalan, iti agkurkurang a bilang dagiti mangisursuro, ti umno ken umiso a kadagupan dagiti teksbok ken tugtugaw, ti pasilidad ti sanitasion no manginagantayo iti sumagmamano  a tinawen a problema ti Edukasion.

Iti biang ti PNP ken dagiti mangipatpatungpal iti urnos, kappia ken talna, maikanatad la unay ti panangragpat iti zero crime incidents kadagiti amin nga eskuelaan ken iti aglawlawna; ti naannayas nga implimentasion ti linteg trapiko; ti panangurnos  iti manamnama a panagdudupudop dagiti 20 million public school students a sumbrek iti panaglukat ti klase iti Hunio 3 ken maipagarup nga umabut iti 3 million private school inton Hunio 10.

All systems go! No adda la ket panagkaykaysa ken panagtitinnulong, maragpat amin nga ingpen nga awan sawsawirna. Isu a kasapulan nga ipaay tunggal indibidual ti biangna a kas makipaset itoy sapasap a panggep ti edukasion.

Mangrugi iti pagtaengan ti kaunaan nga edukasion dagiti ubbing. Isu a napateg la unay ti panagisuro kadakuada ta inton dumteng ti isasagpatda kadagiti eskuelaan sisasaganadan a mangsango kadagiti akem ken responsibilidadda. Dagiti nagannak ti kaunaan a mangisuro kadagiti annak.Ipaay koma amin a kabaelan a mangipaay daytoy kadakuada.

Napateg unay ti edukasion ta isu ti mangmuli ti masakbayan dagiti ubbing—nga isuda ti namnama ti pagilian.#