Footer

EDITORIAL: Ti video clip a nangdayyeg iti lubong

Maipangpangruna la unay ti work ethics wenno kinaadda ti moral a disiplina kadagiti amin nga aramid tapno maliklikan a makaaramid iti maikaniwas kontra iti pammati, tradision, kustombre, ken dadduma a tagipatgen (values) ti maysa wenno ad-adu a puli. Iti kinakurang no di man kinaawan ti disiplina ken respeto kadagiti aramid ken kapanunotan iti sabali, agtinnag laeng iti panagpepengnget ti pammati ken prinsipio; a no dadduma, saan a maliklikan ti pannakaibuis dagiti inosente, pannakadadael dagiti sanikua ken pagbiagan; ken pannakaisaruag ti buteng.

Gapu iti kinaawan iti work ethics, nadayyeg manen ti lubong iti kinadamsak. Naggil-ayab ti nakaam-amak a bales dagiti nasaktan. Inaronan ti awan mamaayna nga aramid ti gura ket timpuar ti nagpaiduma nga aliaw ken aligagaw.

Kastoy ti pinarnuay ti nasurok pito a minutos a video clip iti youtube ken napauluan iti The Innocence of Muslims.

Awan pay ti kinadamsak a napasamak idi nabuyami ti video clip. Addaan laeng iti nasurok a singkueta mil a viewers idi. Napangilangilkami laengen idi iti kinaadda manen ti agal-alingasaw iti buyokna a  basura ken kinaawan disiplina ti aramid; awan ti sabali pay nga intension daytoy no di laeng mangipaay iti sakit- rikna iti nakaisangratanna.

Ket gimmil-ayab ti gura dagiti nasaktan. Rinautda ti American consulate ket pinatayda ti uppat a tao. Lalo pay a dimmakkel ti gil-ayab kadagiti nadumaduma a nasion a pakairamananen  toy pagilian.

Ti kinaawan ti work ethics wenno disiplina iti bagi ti rason. Saan laeng a dagiti nakaisangratan ti video ti binallaibo ken linoko ti maipagarup nga Israeli-American a nangaramid iti video clip no di ket karamanen dagiti casts iti nasao a clip. Inallilawna dagiti nagtalek kenkuana. Aramid a saan a manakman ti kastoy.

Mangibunga laeng iti kinadamsak ti kinaawan disiplina ti tunggal aramid. Apay a kaykayat ti gura idinto a mabalin met ti aggayyem? Apay a kaykayat ti riribuk idinto a mabalin met a patauden ti urnos ken kappia? Apay a kaykayat ti agbuteng ken maaliaw iti riribuk idinto a kabaelam met a patauden ti isem ken garakgak?

Ti kinaawan ti panagraem ken respeto iti sabali ket mangibunga iti saan a panagkikinnaawatan. Ti tao nga awan panagraemna ken respetona iti sabali ket awanan met iti disiplina iti bukodna a bagi.

Ngem saan pay a naladaw ti amin, no idian la ketdi dagiti bambanag a mangikuspil iti rikna ken pammati ti sabali, no liklikan ti mangpasakit iti rikna ti sabali tapno maliklikan a mapasamak met dayta a banag kenka.

Kasapulan ti disiplina iti bagi   no kappia, talna ken pagdur-asan. Ti tao a manginsulto iti sabali ket awan pammategna iti bukodna a bagi.#