Footer

Tinimbang ka ngunit kulang

Itay nabiit, opisial nga indeklara ni Presidente Benigno S. Aquino nga immabuten iti 92.34 million ti populasion ti Pilipinas manipud pay idi Mayo 1, 2010 kas naibasar iti 2010 Census of Population and Housing nga inangay ti National Statistics Office.

Inangay ti NSO ti nasao a sensus manipud iti Mayo agingga iti Hunio 2010 kas intuding ti Commonwealth Act 591 ken Batas Pambansa Blg. 72. Tunggal 10 a tawen a maangay daytoy a sensus.

Limtuad iti daytoy a sensus a ngimmato ti populasion ti pagilian a 92.34 million idi 2010 iti 15.83 million no maikumpara iti populasion idi 2000 a 76.51 laeng. Idi 1990, agdagup laeng ti populasion ti pagiliantayo iti P60.70 million.

Segun met iti Philippines Economics, Philippine Statistics Information and Demographics, ti Pilipinas ti maika-12 a kaadduan iti populasion iti sangalubongan. Ti China ti kadakkelan iti populasion, sumaruno ti India, United States, Indonesia, Brazil, Pakistan, Bangladesh, Russian, Nigeria, Japan, ken Mexico.

Ania ti maagsawtayo iti daytoy a sensus?

Agtultuloy latta ti idadakkel ti populasion ti pagiliantayo nupay saanen a kas idi 1980s agsipud ta immabut pay iti 2.6 porsiento ti annual growth rate a nangpattapataan dagiti otoridad iti populasion nga agdoble ti populasion ti pagiliantayo iti las-ud ti nakurang a 30 a tawen.

Ngem manipud idi 2000, madlaw ketdi a bimmaba ti annual growth rate ket mapattapatta nga aganay laengen a 1.86% nupay maibilang pay laeng daytoy a nangato ket kasapulan a maikkan iti naan-anay a solusion.

Agpayso, no napardas ti panagadu ti populasion, kumiddit ti panggedan ken pagtaudan ti panagbiag dagiti tattao kadagiti barangay ken babassit nga ili ket tumakiasda tapno makigasanggasatda kadagiti dakdakkel nga ili wenno siudad para isasayaat ti panagbiagda. Ngem ti rigatna, sadino man ti pagsangladanda, maparnuay met a problema ti panggedan, paggianan, ken salun-at, malaksid laeng ti panagraira ti krimen ken dagiti illegal nga aramid.

Dagitoy ti problema a mangpadagsen iti ekonomia ti pagiliantayo no iyaleng-aleng ti turay ti napardas nga iyaadu ti populasion.

Ngem yan ti adatna, maysa a katoliko a pagilian ti Pilipinas ket saan nga ipalubos ti Simbaan ti panagaramat iti kontraseptibo wenno dagiti artipisial a wagas tapno malapdan ti panagsikog. Pagarigan laengen ti Reproductive Bill, agingga ita, saan pay laeng a nakapasa iti Kongreso gapu iti isusupring dagiti disipulo ti Simbaan.

Political will ti kasapulan. Gammatan kadi ni Presidente Aquino daytoy a karit? #