EDITORIAL : Trial by publicity?

Indagadag ni Senate President Juan Ponce Enrile ti panagsardeng dagiti kongresista-prosekutor nga agiburandis kadagiti ebidensia maikontra ken ni Supreme Court Justice Renato C. Corona kas iti 300 sq. meters a condo unit iti The Fort iti Taguig City nga agpateg iti P14.5 million a mapapati a kukua daytoy, ti agsipud ta di pay nangrugi ti impeachment trial.

Kinuna ti senador a rumbeng a kabayatan ti impeachment trial ti pannakaipresentar dagiti ebidensia maikontra iti chief justice, saan ketdi a sakbayna tapno saan nga agparang a maysa daytoy a pannakausig babaen ti publisidad.

Kastoy met laeng ti kapanunotan dagiti sumagmamano a senador a pakaibilangan da Senador Panfilo Lacson ken ni Sen. Gregorio B. Honasan II.

Iti sabali a bangir, pudno unay ti imbalikas ni Senate Presidente Pro Tempore Jinggoy Estrada nga “atat na atat na” dagiti kongresista a natudingan a prosecutors iti impeachment trial maikontra ken ni Corona.

Ngem mamatikami a rumbeng laeng nga iti impeachment trial ti pannakaipresentar dagitoy nga ebidensia a “mangsirot iti tengnged” ni Corona. Apay nga agganat unay dagiti congressmen-prosecutors a mangipresentar kadagiti ebidensiada? No kastoy ti ar-aramidenda, masaganaan la ketdi ti kampo ni Corona dagiti addangda ket maipakatda kadagiti pangontrada.

Ngem saan laeng a ti prosekusion ti rumbeng a palagipan ti Senado no di pay dagiti kameng ti depensa ni Corona agsipud ta agsasaganad ti panagparangda kadagiti telebision a pangibagbagaanda iti kinakapsut dagiti ebidensia maikontra ken ni Corona.

Makunami ketdi a psywar ti ipakpakat ti agsumbangir a partido tapno magun-odda ti simpatia dagiti umili.

Saan ketdi a napasamak ti namnamaen ti depensa a panagdarison ti simpatia iti chief justice, banag a saan a nakakaskasdaaw agsipud ta saan a palimed ti kinaasideg ni Corona ken ni dati a Presidente Gloria Arroyo ken ti alegasion a midnight appointee ni Arroyo ni Corona tapno agbalin a kalasagna kadagiti kaso a mapattapatta uray pay idi adda pay iti puestona a maisaklang apaman a maungpotna ti kinapresidentena, kas iti mapaspasamak iti agdama.

Kas nakunamin, rinnupak daytoy iti teknikalidad. Kasapulan nga agannad dagiti kongresista-prosekutor kadagiti ibalikasda agsipud ta posible a maliwliwanda babaen ti bukodda a dila. Batido dagiti mangdepensa ken ni Corona ket manamnama nga uray bassit laeng nga abut, mapadakkelda daytoy a posible a lumsotan ti chief justice.#