EDITORIAL: Umaddangtayo a Natibtibker iti Tawen 2015

SAAN manen a maigawid ti pannakaikupin ti sabali pay a tawen ken isasangbay ti baro a tawen.

Iti panangpasangbaytayo iti 2015, taldiapantayo koma ti napalabas a tawen, no ania dagiti maipagpannakkeltayo a naaramidan para iti pannakaital-o ti panagbiagtayo ken dagiti di maikanatad a naaramidtayo gapu ta taotayo a nalupoy iti lasag; taotayo a managbasol ken nalaka a rimmukma iti sulisog.

Iti panangtaldiapantayo iti napalabas a tawen, amirisentayo koma dagiti nagbiddutantayo, dagiti nabato a dalan a nagdalanantayo a nangtukod ken nangsuot iti tibkertayo. Iti tinaluntontayo a desdes, adda dagiti gundaway a napurisantayo ket naidalubdob ti saem iti dapantayo, nariknatayo ti apges ti masugat, kas kaapges ti pannakapaay ken panagsagaba gapu iti kaawan panagtalek iti bukod a kabaelan.

Iti panagdaliasattayo, adda dagiti gundaway a seknantayo iti panagduadua no husto met laeng ti dalan a taltaluntonentayo, no agtunged daytoy iti berde a kapanagan a mangikarkari iti naraniag a masakbay para iti pamiliatayo. Kadagitoy a gundaway a seknantayo iti alinduadua, mabalin a kayattayon ti agsubli iti naggapuantayo iti baet nga awan ti masirmatatayo a panagdur-as iti biag ken kinataotayo. Ngem kadagitoy a gundaway, nangitanamitimtayo iti kararag a sapay koma ta maikkantayo pay iti pigsa ken bileg a mangibaklay pay kadagiti sumarsaruno a pannubok a masagangtayo iti dalan. Ti pammatitayo iti Dios a nangibaon iti Anakna iti Daga tapno subbotenna ti tao manipud iti pannakaikalang gapu iti basol ti mangidurduron kadatayo tapno baliwantayo manen ti umaddang, iti baet a mangrugin a parukmaennatayo ti lupoy ken kapsut, babassit nga addang, ngem in-inut a mangidanon kadatayo iti turongentayo.

Kalpasan ti panangtaliawtayo iti nalikudantayo, nataltalged ti riknatayo a mangibaskag kadagiti matatayo iti puntiriatayo a turongen, ket mamatikami a babaen ti panangkibin ti Namarsua kadatayo, tumibtibker ti pakinakemtayo a manggaw-at kadagiti tarigagaytayo, dagiti arapaaptayo, ken ti kaibatogantayo a langit iti daytoy paggargarawantayo a lubong.#