EDITORIAL: Umdas a numero ti kasapulan tapno ma-impeach ti Presidente

Indeklara itay nabiit ti Kamara a supisiente ti porma dagiti tallo a beripikado nga impeachment complaints maikontra ken ni Presidente Benigno Aquino III.

Madakamat ditoy a naipila ti umuna nga impeachment complaint maikontra iti Presidente idi Hulio 21. Inakusaran ti grupo ni Aquino a naglabsing iti Konstitusion babaen ti Disbursement Acceleratioin Program (DAP).

Iti sumuno nga aldaw, Hulio 22, nangipila ti grupo dagiti agtutubo iti sabali nga impeachment complaint maikontra met laeng ken ni Presidente Aquino a nangakusaranda kenkuana iti naipanurok a panaglabsing iti Konstitusion, panangliput iti panagtalek ti publiko ken panagkunniber ken korapsion maigapu iti Disbursement Acceleration Program (DAP).

Sabali manen a complaint ti naipila idi Hulio 24 ket mainaig daytoy iti akusasion iti Presidente a naglabsing iti Konstitusion ken betrayal of public trust gapu iti panagpirmana iti Philippine-United States Enhanced Defense Cooperation Agreement (EDCA).

Adda pay maikapat a complaint maikontra iti Presidente, daytoy diay impila ni Alliance of Concerned Teachers (ACT) Partylist Representative Antonio Tinio ngem kinuna ni Iloilo Representative Neil Tupas a saandan nga ikonsidera pay.

Iti biangmi, agar-arapaap a simumulagat dagiti complainant no mamatida a kas kaannayas ti nalanaan a makina ti panagandar ti complaint kalpasan a naipilada.

Mabalin nga ipasindayag dagiti complainant a gapu iti pannakaideklara a supisiente iti porma dagiti tallo nga impeachment complaints, kukuada ti umuna a rikus.

Ala wen, kunatayo a nagballigida iti umuna a rikus. Ngem iti paniriganmi, pakunsuelo laeng daytoy. Baka maklaatdanto laengen no mailusakda inton panagbubutos no supisiente met laeng iti sustansia dagiti tallo nga impeachment complaints. Ita pay laeng, mapaliiwen nga agkutin dagiti bataan ni Presidente Aquino iti Kamara a manglapped iti panagdur-as dagiti tallo a complaint.

Saanen a nasken a dakamaten ditoy kadagiti mangipagpagna iti impeachment maikontra ken ni Presidente Aquino a tapno maipatulod ti complaint iti Senado a mangdengngeg iti daytoy, aglasat pay iti panagbubutos iti Kamara.

Kasapulan ti butos a saan a nakurkurang ngem apagkatlo wenno 97 a butos tapno maaprobaran ti resolusion a mamaggunay iti Artikulo ti Impeachment.
Dakkel ti duadua nga iggem ti oposision ti kasta a bilang!

Ngem kastay kunadan, padpadasli bareng dumawi. Sino ti makaammo no maulit ketdi ti historia, kas iti napasamak ken ni napadisi a Presidente Joseph Estrada?#