EDITORIAL: Uray iti ipupusayna, pinaragsak ni Dolphy ti rinibu

Idi rabii ti Hulio 10, rinibribu nga agraem ken ni Rodolfo Vera Quizon, Sr., ad-adda a nalatak iti nagan a Dolphy, ti nagliday idi impakaammo ti pamiliana a napanen iti sabali a biag.

Pimmusay ni Dolphy idi alas 8:34 ti rabii.

Ngem uray iti ipupusayna, pinaragsak latta ni Dolphy dagiti rinibu nga agraem kenkuana, nangruna dagiti mannugal. Agasem, nasurok a dua ribu a tattao ti nangabak gapu laeng iti panangpustada iti oras ti ipapatayna!

Kasano kunam, kailian?

Apaman nga inwaragawag ti pamilia ni Dolphy a pimmusay ti nalatak a komediante idi alas 8:34 ti rabii ti Hulio 10 iti Makati Medical Center, rinibu nga agtaytaya ti nagdadarupdop kadagiti Lotto outlet ket pinustaanda ti kumbinasion ti eksakto nga oras nga ipupusayna.

Kasla ketdin naigagara, rimmuar ti kumbinasion a 8-3-4 iti Suertres Lotto ket aganay a 1,000 nga agtaytaya iti Kabisayaan ti nangabak iti P4,500  manipud iti P10 a tayada. Nasurok met a 1,200 a sabsabali nga agtaytaya ti nangabak iti P750 gapu ta pinustaanda dagiti tallo a numero iti nadumaduma a kumbinasion iti Rambolito.

Iti daytoy a napasamak, nagsubli la ket ngarud ti di maikupkupin a suspetsa dagiti agtaytaya a manipulated dagiti numero a rummuar iti bola ti Lotto.

Ngem kas ninamnama, impatalged ti maysa nga opisial daytoy nga ahensia iti Bisaya nga awan ti “ginelgel a baraniw” iti iruruar ti kumbinasion nga 8-3-4 a nairana nga eksakto nga oras nga ipupusay ti Comedy King.

Segun iti daytoy nga opisial, imposible nga adda panagsuitik iti pannakabola dagiti numero agsipud ta sinaksian daytoy dagiti pannakabagi ti Commission on Audit ken nai-taped a maipabuya iti telebision.

Dinakamat pay ti nasao nga opisial nga adda dagiti kumbinasion a pinustaan dagiti agtaytaya a rimmuar kagiddan ti maysa a pasken wenno okasion, kas iti iruruar ti kumbinasion a 2-2-5 idi kanikadua a tawena pannakaselebrar ti Edsa Revolution idi February 25 ken iti kumbinasion a 1-4-3 (I love you) idi kanikalima a tawen a pannakaselebrar ti Valentine’s Day.

Ala, naigagara man wenno nairanrana, nasurok dua a ribu a tattao ti naparagsak ni Dolphy ta nagbalin a buenas kadakuada ti oras ti ipupusayna.

No adda man malidayan, awan sabali no di ti maysa a pinansier ti masiao.

No pudno ti damag, agingga ita, agbirbirok pay laeng daytoy iti kadagupan a P500,000.00 a pangbayadna kadagiti amin a nangabak iti dayta a kumbinasion.#