EDITORIAL : Vigan City, Most Child Friendly City

Sabali pay a pammadayaw ti inyalat ti Vigan City itay nabiit. Daytoy ti pannakapilina a Most Child Friendly City iti pagilian para iti tawen 2011.

Napnuan kaipapanan daytoy kaudian a pammadayaw a nagun-od ti Vigan City agsipud ta maikatlo daytoyen a daras a nagun-odna iti baet a nainget ti risiris agsipud ta saan nga asi-asi dagiti siudad a kinasalipna.

Iti daytoy a panangabakna, nagbalinen a grand slam awardee ti Vigan City agsipud ta tallo daras a nagsasaruno ti panangabakna iti daytoy a pammadayaw. No basketbol koma, three-peat, kunada.

Dakkel a dayaw daytoy kadagiti agtuturay ti Vigan City nga idadauluan ni Mayor Eva Marie S. Medina. Ken pagtangsit dagiti amin nga agindeg iti daytoy namirit iti pakasaritaan a siudad a maibilangen a maysa kadagiti kangrunaan a tourist destinations iti Amianan.

Kinapudnona, saan a nakakaskasdaaw no nagsasaruno a nangabak ti Vigan City agsipud ta adu dagiti gannuat ken programa ti gobierno ti siudad tapno mapasayaat ti kasasaad dagiti ubbing ditoy siudad kas iti agtultuloy a suportana kadagiti day care centers kadagiti amin a barangay iti siudad, pannakaipasdek ti Management Information System a nakaidulinan dagiti dokumento ken ladladawan,  ti Geographic Information System, E-Vigan no sadino a naikkan dagiti barangay iti kompiuter kas komunikasion ken pagresertsan, ken ti agtultuloy a panangtulong kadagiti ubbing nga addaan rangkap babaen ti Stimulation  and Therapeutic Activity Center.

Naipasdek pay ditoy siudad ti Vigan Buridek Children’s Museum, Children’s Theatre iti Burgos Memorial School West, Children’s Hour para kadagiti babbai ken ubbing, ken pannakaipasdek ti children’s desk iti police station.

Itay laeng nabiit, iti pannakaselebrar ti Children’s Month, sinublat iti apagbiit dagiti ubbing ti rienda ti turay. Nagunggonaan pay dagiti mamasirib nga ubbing ditoy siudad ket naikkanda iti sertipiko ken insentibo a kuarta.

Insagut ni Mayor Eva Marie S. Medina ti pammadayaw kadagiti umili ti Vigan idinto nga inyunay-unayna nga isuda ti “key players” iti pannakagun-od dagitoy a nasional a pammigbig idinto ta inkarina nga agtultuloy a napigsa dagiti programa ken proyekto para kadagiti ubbing iti Vigan agsipud ta dagitoy ti namnama iti masakbayan.

Makunami met: nagun-od ti Siudad ti Vigan dagitoy a pammadayaw agsipud ta ti mangidaulo ket maysa a mannakaawat nga ina a mangipatpateg ken mangisaksakit kadagiti ubbing ditoy siudad.#