EDITORIAL: Weather weather laeng!

Kas ninamnama, indauluan ni dati a Presidente ken Cong. Gloria Macapagal Arroyo dagiti kaaliadona a nanglapped iti pannaka-impeach ni Ombudsman Merceditas Gutierrez iti Kamara ngem naisualitda iti aglaplapusanan a butos dagiti kaaliado ni Pres. Aquino. Maak-akusaran ni Gutierrez a mangsalsalaknib ken ni Arroyo kadagiti mapapati nga anomalia a nakaisawsawan daytoy ken ti pamiliana bayat ti panagtakemna.

Dakkel ti kaipapanan ti pannaka-impeach ni Gutierrez iti House of Representatives agsipud ta daytoyen ti posible a pangrugian ti pannakaipila dagiti impeachment complaints maikontra iti dati a presidente ken nangangato nga opisial tapno mausigda gapu kadagiti maipabpabasol kadakuada nga anomalia ken panagabusoda iti takemda bayat ti kaaddada iti turay.

Madakamat ditoy nga uray idi presidente pay ni Arroyo, addan dagiti impeachment complaints a naipila iti House maikontra kenkuana. Ngem agsipud ta iggemna ti mayoria iti Kamara, saan a dimmur-as dagitoy a complaint. Iti baet dagiti nadadagsen mga ebidensia  nga indatag ti oposision iti Kamara,  naibasura laeng dagitoy gapu iti makunkuna a tyranny of numbers – saanda a magun-od ti naituding a bilang tapno maipangato ti complaint iti Senado.

Ngem iti isusublat ti administrasion ni Presidente Benigno Aquino III a nagkampania iti plataporma a nadalus a panangituray, nagbaliw ti turong ti pul-oy ket nagbalin laengen a minoridad ti sigud a nakabilbileg a partido ni Arroyo.

Ipetpetteng ni Gutierrez nga awan ti kinapudnona dagiti alegasion maikontra kenkuana ket inaramid ti Ombudsman amin a kabaelanna a mangkamat kadagiti agtuturay a nangabuso iti takemda.

Kasapulan ita ni Gutierrez a saganaan ti depensana agsipud ta iti daytoy a pannakausigna, uray maysa laeng a complaint a maikeddeng iti Senado maikontra kenkuana ket umanayen a pakaikkatanna.

Kabayatanna, uray kasano a panangibaga dagiti senador nga agbutosda babaen ti konsensiada, manamnama nga agbutos a sangsangkamaysa dagiti kaaliado ti presidente tapno maikkat ni Gutierrez iti puestona.

Dayta ti yan ti paitna. Idi tiempo ni Arroyo, uray kasano a panangkulding dagiti adda iti oposision ti puso dagiti kabaddungalanda iti mayoria, saan a naitaltalek ti anek-ekda ket naibasura laeng ti impeachment complaint. Ita, nagbalinsuek ti sasaadenda. Daydi mayoridad, nagbalin a minoridad. Ita ta minoridaddan, laklak-amendan ti impalak-amda iti oposision idi ngem mayoridad itattan.

Kinuna ni Risa Hontiveros, maysa kadagiti nangipila iti impeachment complaint maikontra ken ni Gutierrez: “No maikkat ti Ombudsman, madalusan ti dalan para iti patas a rupak a mangdusa ken ni Arroyo.”

Nabagas a balikas a maiturong ken ni dati a Presidente Arroyo. Ita pay laeng, masapul nga agsagana metten ti dati a presidente agsipud ta isu la ketdi ti sumaruno a puntiria dagiti nangipila iti impeachment complain maikontra ken ni Ombudsman Gutierrez.#