Footer

EDITORIAL:Rebbengna a masuportaran ti CHR

Kaarigna iti arbis iti kalgaw ti waragawag ni Commission on Human Rights chair Leila de Lima a maikkan iti immunidad iti persekusion ti asinoman a tao, pakairamanan dagiti ahente ti militar, nga adda ammoda maipapan kadagiti political killings ken puersado a panagitalaw tapno masolbar dagitoy a krimen.

Segun ken ni de Lima, adda pagbatbatayan a linteg ti CHR a mangited iti immunidad kadagiti tattao nga adda ammona nga impormasion, adda ikutna a dokumento wenno dadduma pay nga ebidensia a kasapulan iti pannakatunton iti kinapudno kadagiti inbestigasion nga isaysayangkat ti nasao a komision wenno dagiti autoridad.

No apay a saan nga inaramat daytoy dagiti napalabas a dadaulo ti nasao a komision ti saan a maawatan iti sanguanan dagiti nagkaadu a kaso mainaig kadagiti pamapapatay nga adda pakainaiganna iti politika ken pannakakautibo dagiti biktima nangruna dagiti kameng ti militante a grupo, kumankannigid ken dagiti kritiko ti turay.

Segun iti rekord ti Karapatan, maysa a grupo dagiti mangipagpagna iti kalintegan pantao, addan 887 nga extrajudicial killings ken 185 enforced disappearances manipud idi Enero 21, 2001 agingga iti Oktubre 2007.

Ngem kuna dagiti opisial ti militar a saan a kasta ti kinaaduda ken pinaglibakanda nga adda pannakaammoda kadagitoy a pammapatay ken panagitalaw.

Ala, suportarantayo daytoy nga addang ti CHR tapno maikkan iti naan-anay a ngipen ti komision a mangipatungpal iti pagrebbenganna iti baet ti pammaliiw a maiyaleng-aleng laeng daytoy nga ahensia.

Makunami daytoy ta agdagup laeng iti P25 milion ti pundo nga iyal-alokar ti Malakaniang iti CHR iti baet dagiti nagkaadu a biktima a marabrabngis ti kalinteganda a pantao babaen ti bayolente a wagas.

No dakdakkel ti pondo ti CHR, dakdakkel met la ti busbosen ti ahensia iti panangiwayatna iti independiente nga inbestigasion, nangruna iti pannakaipasdek ti forensic center tapno saan laeng nga agdepdepende iti polis, University of the Philippines ken pribado a kompania para iti sientipiko a pannakaamiris ken pannakasukimat dagiti ebidensia  para iti nadardaras a pannakarisut dagiti pammapatay ken pannakaitalaw.

Panawenen a mapapigsa ken mapabileg ti CHR tapno maibaklayna a naan-anay ti nadagsen a responsibilidadna iti sanguanan dagiti nagkaadu a biktima iti political killings ken panagitalaw.

Kas ita, napudot manen nga isyo ti mapapati nga engkuentro a nakatayan dagiti sumagmamano a tattao a kuna ti polis a suspetsa iti pammapatay ken pannakatakaw iti maysa a bangko ngem ipetpetteng met dagiti pamilia dagiti biktima a maysa a rubout.

No saan a maikkan iti naan-anay a ngipen ken busbosen ti CHR, agtultuloyto latta dagiti pammapatay ken pannakaitalaw nga agdadata a panangguyab iti kalintegan pantao.#