Eksamen ti Agriculturists, nakansela gapu iti Typhoon Lawin

BAGUIO CITY, October 19, 2016 – Kinansela ti Professional Regulation Commission ti maikadua ken maikatlo nga aldaw ti Board Licensure Examination for Agriculturists a maangay koma ditoy siudad gapu iti dakes a tiempo nga insangbay ni Super Typhoon Lawin.

Kinuna ti Commission ken ti Professional Regulatory Board of Agriculture a maireset ti eksaminasion kadagiti siudad ti Tuguegarao ken Baguio kas maibatay iti Commission Resolution No. 2014-864, “Guidelines on the conduct or cancellation of licensure examinations during inclement weather”  ken ti peggad nga itden iti isasangbay ti nasao a bagyo.

Sakbayna, inwaragawag dagiti weather forecasters ti panagtupak ti bagyo iti Cagayan iti 11:00 ti rabii ti Oktubre 20., a pakairamanan ti Tuguegarao City nga addaan iti nadamsak nga angin nga agpigsa agingga iti 220 kph ken siplagna nga agpatingga iti 305 kph.

Naibayog ti Signal No. 5 iti Cagayan idinto a Signal No. 3 iti Baguio City.

Kinuna ti PRC a maiballakad kadagiti ageksamen ti panangbisitada iti www.prc.gov.ph para iti updates ti pannakaituloy ti eksamen wenno agturongda iti PRC Tuguegarao ken Baguio Regional Offices para iti impormasion.#