Eksplosibo, balbala, naidispatsa iti igid ti kalsada

NAGBUKEL, Ilocos Sur – Nakaawat dagiti polis ditoy iti tawag iti telepono manipud iti maysa nga umili nga adda indispatsana nga eksplosibo ken balbala iti igid ti barangay road itayi nabiit.

Kinuna ti di nagpabigbig nga umili a mariribukan iti kaadda dagiti eksplosibo ken balbala iti ikutna nga inkeddengna nga idispatsa dagitoy iti asideg ti arko iti nagbeddengan ti Barangay Taleb ken Casilagan ditoy nga ili idi agsapa ti Nobiembre 8.

Dagus a nagresponde dagiti polis ditoy apaman a naawatda ti tawag ket nagturongda iti nadakamat a lugar ket ditoy a nakitada ti maysa a sako a nagkarga iti dua a hand grenade, maysa a M203 grenade ken 53 a bala para iti cal 7.62.

Addan iti kustodia ti Explosives Ordnance Division, ISPPSC dagiti granada ken balbala para iti umisu a disposision.#