Latest News: Ektension ti operasion dagiti jeep ‘pannangallilaw’ — PISTON | Tawid News Magazine - Weekly Ilocos News 📰

Ektension ti operasion dagiti jeep ‘pannangallilaw’ — PISTON

BAGUIO CITY — Mapangallilaw ti impalgak ti Department of Transportation (DOTr) iti daytoy napalabas a lawas maipapan iti pammulubos ti ahensia iti panagtuloy ti operasion dagiti daan a jeepney iti rotada.

Daytoy ti kinuna ni George San Mateo, president emeritus ti Pinagkaisang Lakas ng Tsuper at Operators Nationwide (PISTON) iti naangay a forum idi Nobiembre 30 ditoy Baguio. Dimmar-ay ti nasurok 50 a representante dagiti pederasion ti jeepney operators ken drivers iti Baguio City ken probinsia ti Benguet, Kalinga ken Abra.

READ: Pannakaipakat ti PUV Modernization Program

“Actually, yung ipinahayag ng DOTr, essentially, ay mapanlinlang kasi sinasabi na papayagan na daw nila yung extension ng mga kasalukuyang jeep lagpas ng June 2020 pero nagpataw naman sila ng mabibigat na kondisyon,” kinunana.

Segun kenkuana, kangrunaan kadagiti nadadagsen a kondision ket ti panagtalinaed ti deadline dagiti kasapulan a leppasen dagiti operators para iti franchise consolidation. 

Iti pagblaak ti DOTr, inlawlawag ti ahensia a maituloy ti pannakaimplementar ti PUV modernization. Maikkan iti gundaway dagiti daan a jeepney nga maituloy ti panagpasadada no la ketdi pumasa ti lugan iti motor vehicle inspection system (MVIS) wenno roadworthiness test. Kasta met a kasapulan nga isumite dagiti operator ti petition for consolidation sakbay ti June 30, 2020.

Kinunana ni San Mateo nga awan iti problemada maipapan iti panangisayangkat ti roadworthiness test, ngem saanda nga umannugot iti inaramid ti gobierno a panangbaliw iti sigud a standards ti MVIS.

“Ang sinasabi kasi nila dapat high-tech at compliant sa Euro 4 standards kaya binago nila. Mula sa 2.5 carbon emission ay ibinaba sa 1.5 [pero] wala naman silang malinaw na inihahaing program para tulungan kaming i-upgrade ang aming makina,” innayonna.

Para kenni Cresencia Ferido, presidente ti Bangued-Pilar-Villavisciosa JODA, mangitunda ti nasaknap a panakapukaw ti pangkabiagan ti PUV modernization nga idurduron ti gobierno.

“Ti kiddawmi koma a babassit nga operator ket maited met ti pagrebbenganmi a saan koma a mabaliwan dagiti luganmi [ken] umutang kadagiti agar-aramid ti modern a lugan ta saanmi a kaya. Narigat ti mangilumlom ti bagina iti utang,” kunana.

Impalawagna nga saan nga inaldaw ti panagbiaheda ken uray pay no mabukelda ti kooperatiba para iti rotada ket saanda a kabaelan ti milyon a kapital para iti panangpabaro dagiti luganda.

“Nakitakon diay iprompromoteda a lugan, saan a maitutop daytoy kadagiti mountainous a papanan ken saanna kaya a laonen dagiti karga ti pasahero,” innayonna.

Kuna ni San Mateo a binaliwan laeng ti DOTr ti immuna a deadline para iti jeepney-phaseout tapno maallukoyda pay dagiti dadduma nga operators a sumurot iti programa. Segun kenkuana, pilpiliten ti DOTr dagiti operator gapu ta saan pay a nadanun ti kasapulan a bilang ti kooperatiba para iti franchise consolidation.

Iti imatang ni San Mateo ket maysa a “blackmail” ti imbalaag ti ti DOTr a no saan a mabukel dagiti consolidated franchise wenno agisumite dagiti operator iti nadakamat a kasapulan a dokumento ket maited ti sigud a rotada kadagiti nakatakderen a kooperatiba ti transportasion.

“Iligal dahil may existing franchise kami at kailangang dumaan sa due process bago yan kanselahin,” kuna ni San Mateo.

Binukel dagiti nakipagpaset a pederasion ti rehional a koalision a nanaganan iti Cordillera Coalition for Pro-people Modernization. Iti pablaak ti panagkaykaysa ti grupo, kinunada a “ti transportasion ti rehion ket kasapulan a mapadur-as para iti pagsayaatan ti umili, mairaman kami nga operaytor ken drayber.”

Ngem patienda a ti PUV modernization program ti gobierno ket mangipaay ti pannakamonopolio ti sektor ti transportasion. 

Kinunada a mabalin a magun-od ti modernisasion babaen ti panangipaay ti gobierno ti tulong para iti rehabilitasion dagiti sigud a luganda, kasta met iti panangited ti umannatup a suporta kadagiti lokal nga agar-aramid iti jeep.

Kinunada a nakasaganada a makipaset ken mangpairteng ti tignay kontra iti jeepney phaseout kadagiti sumarsaruno nga aldaw no saan nga ikkan ti gobierno ti atension dagiti rekomendasionda. ●