Elderly, bigbigbigen ti LGU ti San Juan

SAN JUAN, Ilocos Sur – Kas panangbigbigna kadagiti kadagiti babbaket ken lallakay ditoy nga ili, nakipaset ti lokal a gobierno ditoy iti Elderly Week Celebration itay nabiit.

Kinuna ni Leonides Purugganan, federated president ti gunglo dagiti senior citizens ditoy nga ili a  nagiwaras ti lokal a gobierno nga idadauluan ni Mayor Benjamin Sarmiento iti relief goods kadagiti elderly kas pannakipasetna iti selebrasion.

Kinuna ni Sarmiento a nainget a maipakpakat iti San Juan ti pannakaited iti 20% discount kadagiti elderly no gumatangda iti agasda,  transportasion, ken dadduma pay a benepisio kas intuding ti linteg.

Innayon ti mayor a naikkan pay dagiti elderly iti priority lane kadagiti pagopisinaan iti munisipio tapno nadardaras ti pannakaipaay ti serbisio kadakuada.#