Election gun ban iti Ilocos Sur, maipatpatungpalen

CAMP ELPIDIO QUIRINO, Bulag, Bantay, Ilocos Sur – Nangrugi a maipatungpal ti election gun ban ditoy probinsia itay Abril 28 tapno masigurado ti urnos ken talna iti masungad a pannakabutos ti diputado a sumukat ken ni dati a First District Congressman Ronald Singson.

Kanaig daytoy, imbilin ni Ilocos Sur OIC provincial director Senior Supt. Reynante Partible ti pannakaimplementar ti round the clock a panagbantay dagiti polis kadagiti maipasdek a checkpoint kadagiti nadumaduma nga ili iti probinsia tapno naurnos ken natalna ti maangay nga election.

Inlawlawag met ni Comelec Provincial Election Supervisor Atty. Marino Salas a nupay iti umuna a distrito laeng ti pakaangayan ti special election, sakupen ti gun ban ti intero a probinsia.

Naituding ti Mayo 9-13 a panagipila dagiti kandidato iti kandidaturada idinto a Mayo 14 agingga iti Mayo 26 ti campaign period.

Inton Mayo 28 ti pannakaangay ti special election.

Ni Vigan Vice Mayor Ryan Singson, anak ni Gov. Luis “Chavit” Singson, ti napili dagiti dadaulo ti partido iti probinsia a kumandidato para iti puesto a binakantean ni dati a Congressman ti First District Ronald Singson.

Nupay kasta, kinuna ti gobernador a no adda sabali nga agkandidato nga aggapu iti grupo, saan a maparitan daytoy agsipud ta impaganetgetna nga “addatayo iti  nademokrasiaan a pagilian”.

“Ti la dawatek, agbalin koma ti eleksion a natalna, awan koma ti pammutbuteng, awan ti inuulbod tapno saan a maallilaw dagiti kaprobinsiaantayo,” kinuna ti gobernador.

Kinuna ti bise mayor a dakkel a karit kenkuana ti pannakapilina a kandidato para kinadiputado ket ad-adda pay nga agtrabaho para kadagiti kailianna iti umuna a distrito,” kinuna ti bise mayor.

Kinuna ni Singson a no isu ti mangabak, itultuloyna nga iringpas dagiti proyekto a napanawan ti kabsatna sananto irugi dagiti bukodna a proyekto.

Intuding ti Commission on Elections Manila ti pannakaangay ti special election inton Mayo 28 para iti nagbakante a puesto iti umuna a distrito ti Ilocos Sur.

Indeklara ti Kamara a bakante ti puesto ti kinadiputado iti umuna a distrito ti Ilocos Sur kalpasan ti panangiyetnag ti Hong Kong court ti sentensiana ken ni dati a Congressman Ronald Singson a makatawen ken innem a bulan a pannakabalud gapu iti drug trafficking.

Da dati a Bokal Efren Rafanan, Sr., ken Trandy Baterina dagiti maal-alimadmad a kumandidato a sumango ken ni Singson.

Segun iti Comelec Manila, manu-mano ti maaramat a panagbilangan iti butos iti masungad nga special election iti umuna a distrito ti Ilocos Sur.#