Electric coops a di CDA registered, dida entitled iti tax exemption: party list rep

STA CRUZ, Ilocos Sur – Nagsupanget manen dagiti balikas ti party list a mangibagi iti kooperatiba iti pagilian ken maysa nga opisial ti kooperatiba ti elektrisidad ditoy probinsia mainaig iti tignay ti immuna a panagkameng dagiti electric cooperatives iti Cooperative Development Authority (CDA).

Idagdagadag ni COOP-NATCCO Party List Representative Jose Ping-ay ti panagkameng amin nga electric cooperatives iti CDA agsipud kadagiti mapapati a dakkel a bentahe a masagrapda iti babaen ti nasao nga ahensia.

Kinuna ni Ping-ay a no agkameng ti Ilocos Sur Electric Cooperative (ISECO) iti CDA, adda tax exemption ti kooperatiba kadagiti buis nga agtungpal iti nababbaba a bayadan dagiti agar-aramat iti elektrisidad ditoy probinsia.

Kinuna ni Ping-ay nga adda masingsingir kadagiti consumers a vat on distribution, vat on  system loss, ken vat on life line sana sinaludsod no sadino ti pappapanan dagitoy a singsingiren ti ISECO.

“… Dakkel ti pagbaybayadtayo iti ISECO iti VAT on distribution, VAT on system loss ken VAT on life line rates ket no saanda nga agbaybayad idiay BIR, isublida dagitoy (kadagiti consumers)… saanda nga entitled iti tax exemption agsipud ta saanda a CDA registered,” kinuna ni Ping-ay iti interbiona ken ni Jun Ramos ti Commando Brigada a naipatangatang iti DWRS itay nabiit sana innayon a no madagup dagitoy a masingir a maibayad iti BIR, umabot iti P90 agingga iti P100 milion iti tunggal tawen.

Kinuna ni Ping-ay a no agrehistro ti ISECO iti CDA, saanen a masingir dagitoy kadagiti consumers.

Idi napan a tawen,   impalgak ni Ping-ay a nagpukaw ti ISECO iti P119 milion idi 2007, nasurok a P80 milion idi 2008 ken aganay a P70 milion idi 2009.

“Apay nga agluglugi ti ISECO? Ania dagiti contributory factors no apay nga agluglugi?” sinaludsod ni Ping-ay idinto nga innayonna nga imbatayna ti manipestasionna iti naited kenkuana a dokumento idi naawis a guest speaker iti general assembly nga insayangkat ti ISECO.

“Saandak koma a pabasolen ta imbasarko ti manipestasionko kadagiti dokumento a naited kaniak,” kinuna ni Ping-ay.

Kinuna ti party-list representative a saan nga “at liberty” a mangiwaragawag iti naduktalanna no saan a public documents dagiti naited kenkuana ken naggapu a mismo iti ISECO.

Kinuna ni Ping-ay a kasapulan nga analisaren dagiti opisial ti ISECO dagiti makagapu iti net losses daytoy agsipud ta dagiti consumers ti kooperatiba ti agsagrap kadagitoy a pukaw.

“Sino ti agbayad iti systems loss… datayo,” kinuna ni Ping-ay. “Uray saantayo a nausar a koriente, bayadantayo latta.”

Iti maysa pay nga interbio ken ni Ping-ay, kinunana a nupay maysa a kooperatiba ti ISECO, saan a kukua dagiti tattao ken dagiti consumers ket saanna a sagsagrapen dagiti pribiliheo dagiti kooperatiba a nakarehistro iti Cooperative Development Authority (CDA).

Indagadag ni Ping-ay nga agrehistro dagiti electric cooperatives iti Cooperative Development Authority agsipud ta agsagrap dagitoy kadagiti exemption kas iti VAT on distribution, vat on systems loss ken vat on life line  rates.

Kinuna pay ni Ping-ay a kurang ti pannakaammo dagiti nabutosan nga opisial ti ISECO iti akem ti CDA ken ti NEA ket masapul a lukatanda ti pampanunotda a makiinnadal no ania dagiti bentahe no agrehistro ti ISECO iti CDA.#