Electric coops a nagrehistro iti CDA, saanda a tax free: ISECO board president

CABUGAO, Ilocos Sur -Impetteng ti Board president ti kooperatiba ti elektrisidad ditoy probinsia a saanda a pabor a maikappeng daytoy iti Cooperative Development Authority manipud iti National Electrification Administration kalpasan ti pannakapaliiwda ti saan a nasayaat a nagbanagan dagiti immunan a nagrehistro iti CDA.

Kinontra pay ni ISECO Board President Tirso “Bong” Savellano ti imbatad ni Ping-ay a tax free dagiti nagrehistro iti CDA ket dinakamatna dagiti sumagmamano nga electric cooperatives a pakairamanan ti Abra Electric Cooperative ken ti Pangasinan Electric Cooperative a nagrehistro iti nasao nga ahensia ngem agingga ita, dida met sagsagrapen ti libre a buis kas imbaga ni Ping-ay.

Kinuna ni Savellano nga adda pay electric cooperative a nagrehistro iti CDA iti liman a tawen ngem saanna met a sagsagrapen ti libre a buis agsipud ta nagrigat a tungpalen dagiti requirements.

Maysa a requirement a dinakamat ni Savellano ti pannakaala dagiti tax identification number (TIN) amin dagiti consumers.

Kinuna ti board president nga inadalda a nalaing daytoy a gannuat ni Ping-ay ngem adda panagpangaduada agsipud kadagiti saan a nasayaat a nagbanagan dagiti electric cooperatives nga immuna a nagrehistro iti nasao nga ahensia.

Kinunana a saan koman nga  napadpadayawan ti ISECO nga outstanding taxpayer ti BIR no saan nga agbaybayad daytoy kadagiti makolektana mainaig iti VAT on distribution, VAT on system loss ken VAT on life line rates.

Kinunana a para kolekta laeng ti ISECO kadagitoy a buis ket apaman a masingirda ti billing dagitoy a VAT iti distribution, system loss ken life line rates, iremitda a dagus iti BIR.

Iti immun-una nga interbiona,  kinuna ti board president ti kooperatiba nga aggudengda iti ipagpagna ni Ping-ay a pannakaikappeng dagiti electric cooperatives iti babaen ti CDA agsipud ta adu dagiti kooperatiba a nagmiembro iti CDA a nagpukaw.

“Dagiti dadduma a kooperatiba, nag-anderda iti CDA, ania ti nagbalinanda tatta? They are all in the red (naglugida amin)… panayda negative balance… naabusar dagiti dadduma,” kinuna ni  Savellano sana sinaludsod: “Kayattayo ngarud daydiay?”

Kinuna pay ni Savellano a sabali a kooperatiba dagiti electric cooperatives a kas iti ISECO ta utility ti ipatpatarayda, saan a kas dagiti dadduma a kooperatiba a para pautang wenno livelihood.

“… Ania ti maitulong ti CDA, … adda kadi inhinieroda a makatulong kadakami?” sinaludsod ni Savellano.

Kinuna pay ni Savellano a nupay awan ti buis a bayadan dagiti electric cooperatives no agpalistada iti CDA, adda bayadanda iti nasao nga ahensia a 10% manipud iti revenue ti kooperatiba a di met agsubli kadagiti consumers.

Iti sabali a bangir, nupay agbayad iti buis dagiti electric cooperatives iti gobierno, agsubli daytoy iti NEA nga adda iti babaenna para iti pannakatulong dagiti kooperatiba, segun iti board director.

Kinuna ni Savellano nga interesado ni Ping-ay nga agpalista dagiti electric cooperatives iti CDA agsipud ta natalged ti pinansial a posision dagiti dadduma ngem iti teknikal a rason, awan ti maitulong ti CDA kadagiti electric cooperatives.

Kabayatanna, kinuna ni Engr. Egdon Sabio bayat ti presscon ti ISECO a naangay iti main office daytoy iti Santiago, Ilocos Sur  a saanda nga irikep ti ruangan mainaig iti iyaakar ti ISECO iti CDA “ngem ketdi agsiputtayo nga umuna. No makitatayo a simmayaat ti kasasaad dagiti immakar nga electric cooperatives, apay ketdin a ditayo tuladen ida? Ngem no makitatayo nga awan nagbaliwanda wenno lalo pay a bimmaba ti kasasaadda, agtalinaedtayo laengen iti salinong ti NEA nga uppat a pulon a tawen a mangkitkita iti pagsayaatan dagiti electric cooperatives,” kinuna ni Sabio.#