Electrician, napaltogan

NARVACAN, Ilocos Sur – Pinaltogan dagiti armado a tattao ti maysa nga electrician iti Barangay Bulanos ditoy nga ili idi rabii ti Mayo 11.

Napasamak ti pammaltog iti compound ni Barangay Captain Loreto Caballes ket nainaganan ti biktima a ni Alfredo Caballes y Cabonce, 64, naasawaan, ken residente iti Barangay San Pedro, Laguna.

Iti inisial nga inbestigasion, madama ti drinking session ti biktima, kaduana ti kabsatna a ni Franky Caballes ken maysa a Jim Mercado iti sango ti ridaw ti compound ti barangay captain idi pinaltogan dagiti di pay nabigbig a suspek.

Naglak-am iti sugat ti biktima iti makannawan nga abagana ket intaray dagiti kabagianna iti Central Ilocos Sur District Hospital para iti pannakaagasna.

Di pay ammo ti motibo ti pammaltog.#