Banner News: Eleksion iti Ilocos Sur: natalna ngem napaliiw ti nakaro a pannakausar iti kuarta | Tawid News Magazine - Weekly Ilocos News 📰

Eleksion iti Ilocos Sur: natalna ngem napaliiw ti nakaro a pannakausar iti kuarta

VIGAN CITY — Nasaysayaat laengen a nanglayus iti kuarta ta adu dagiti nabenepisiaran, ngem ti nagayus iti dara wenno kinadamsak iti politika.

Dayta ti panangiyarig ken panangiladawan a balikas maipapan ti kalepleppas nga eleksion dagiti adu nga umili a nakauman dagiti kameng ti Parish Pastoral Council for Responsible Voting ken Catholic Media Network kabayatan ti pannakiuman kadakuada iti kaaldawan ti National and Local Midterm Elections idi Mayo 13, 2019. Nagkaykaysa dagiti adu a botante a nangipeksa ti kananakem ken kaririknada maipapan ti paliiw ken padasda iti napalabas nga eleksion.

Napasnek a nakipaset dagiti 2,000 poll volunteers ti PPCRV, citizen’s arm ti Commission on Elections iti napalabas nga eleksion iti panangidaulo ni Rev. Fr. Danilo Martinez, Archdiocesan Director ti Social Action Commission, ken PPCRV Provincial Coordinator. Nakikaysa pay dagiti 41 a parokia ti Nueva Segovia iti dua a siudad ken 32 nga ili ti Ilocos Sur.

Iti kaaldawan ti eleksion a panagronda dagiti kameng ti CMN ken PPCRV kadagiti nagduduma a public schools a nausar a voting precints, adu a nakauman ti media a botante dagiti nakapaliiw nga adda dagiti pasurot dagiti kandidato ken partido ti nagpakamakam a nagiwaras iti regalo a kuarta kadagiti botante tapno agballigida iti eleksion.

“Inawatmi ti kuarta nga inwarasda ta sayang ken kasapulanmi, ngem imbotosmi met latta dagiti kursunadami a kandidato,” kinuna ti maysa nga umili a taga-Narvacan.

“Kanayon koma ti eleksion tapno mabenepisiaran dagiti umili ta sumangpet dagiti maibunong a kuarta ken tulong uray saanka a dumawdawat,” kinuna met ti maysa a nakauman a botante iti ili ti Cabugao.

“Tinangdanandak laeng nga umay agbotos ditoy ta napalaus ti rigatmin ken kasapulak unay iti panangisakadko ti pamiliak,” kinuna met ti maysa a nataengan a babai a natiliwan a masuspetsa a flying voter iti ili a Santa Catalina.

Nagbalin a naannayas ti nagmalem nga eleksion malaksid kadagiti naireport a pannakataktak ti panagbotos gapu kadagiti insidente ti panagdadael wenno panag-malfunction dagiti voting counting machines sadiay Brgy. Camindoroan ken Sunggiam iti ili a San Juan, Brgy. Dinaratan iti Salcedo, Brgy. Suvec iti ili a Salcedo, ken dadduma pay a barangay ken ili iti Ilocos Sur.

Adda dagiti nagpalia ken nasukatan ti Security Disk Card ti VCM a naggapu pay dagiti kasukatda manipud iti Commission on Elections Regional Office iti San Fernando City, La Union. Napagtutulagan dagiti kameng ti Board of Election Inspector ken dagiti poll watchers ti PPCRV ken dagiti partido ti pannakaituloy ti panagbotos ken naurnong dagiti nausar a balota. Naaramid met ti pannakaisubo dagiti nausar a balota iti VCM apaman a nasimpada.

Naireport pay iti PPCRV Provincial Headquaters dagiti nagduduma nga insidente ti panagiwaras iti sample ballot iti asideg dagiti presinto, pannakabartek, ken dadduma pay a panaglabsing iti Omnibus
Election Code.

Nakaawat pay dagiti PPCRV coordinators iti report nga adda dagiti insidente nga adda dagiti local government employees a nagserbi a kameng ti BEI iti kalaksidan nga adu met dagiti makabael a mangisursuro ti Department of Education a prioridad koma a nagserbi iti eleksion.

Iti PPCRV roving sadiay eskuela iti Pangada, Santa Catalina, maysa a suspek a babai a flying voter ti naduktalan ti PPCRV pollwatcher a bimmotos iti dayta a presinto kalpasan a nakabotosen sadiay Narvacan.

Nasitar ti suspek kalpasan a nakabotos ken nadlaw ti pollwatcher ti saan a naan-anay a pannakapunas ti indelible ink iti ramayna a tammudo, ket in-verifyda ti nagan ti suspek iti COMELEC computer, ket natakuatan nga immunan a nakabotos sadiay Narvacan.  

Kabayatan pay ti panag-ronda dagiti PPCRV coordinators kadagiti nagduduma a presinto kadagiti ili ken siudad, napaliiw ti kaadda dagiti kameng ti Philippine National Police.

Iti assessment ti Ilocos Sur Police Provincial Office iti panangidaulo ni Colonel Adolfo Rafanan, nagbalin a natalna ken nakappia ti eleksion iti probinsia iti laksid dagiti sumagmamano a napasamak nga insidente ti panaglabsing ti linteg.

Nagbalin a natalna ken nakappia ti eleksion babaen ti panagtitinnulong ti COMELEC nga idauluan ni Atty. Marino Salas, Provincial Election Supervisor ken dagiti security forces, PPCRV ken dadduma pay nga stakeholders iti pribado a sektor.