Eleksion iti Ilocos Sur: Ryan Singson, nangabak a gobernador; Ronald, agsubli a congressman

VIGAN CITY – Naminsan pay a pinaneknekan ni Gov. Luis “Chavit” Singson nga awan ti makaibalat kenkuana iti politika iti Ilocos Sur kalpasan nga inluges dagiti annakna a kandidato para congressman ken gobernador dagiti kasupangetda iti kalkalpas nga eleksion.

Malaksid iti Lidlidda ken Tagudin a baluarte ni Mayor Roque Verzosa, Jr., imbalat ni Congressman Ryan Luis Singson daytoy kasupangetna para iti kinagobernador ti probinsia iti amin nga ili.

Kanaig daytoy, nupay awan pay naawatda a resulta ti panagbubutos iti Sinait, Magsingal, ken Cervantes gapu iti aberia ti PCOS machine, napagtitinongan ti provincial board of canvassers idi pasado alas siete ti rabii ti Mayo 14 ti pannakaiproklama a nangabak iti eleksion dagiti agkabsat a Singson ken ni incumbent Vice Gov. Deogracias Victor Savellano agsipud ta uray maibbongda kadagitoy nga ili ket saanen a makamatan pay dagiti kinabalubalda.

Iti opisial a partial a resulta ti panagbubutos a nakanbas ti PBC, iti para gobernador, nakagun-od ni Ryan Singson iti 179,935 a butos maikumpara iti 89,271 a butos ni Verzosa wenno iti diperensia a 90,669 a butos.Sakbay ti eleksion, kinuna dagiti political pundits a risiris ti panagsango manen da incumbent Vice Gov. Deogracias Victor Savellano ken ni dati a Bokal Efren Rafanan, Sr para iti kinabise gobernador.  Ngem kasungani iti ekpektasion dagitoy, ginaboran ni Savellano ni Rafanan iti butos iti panangipaneknekna a saan a kabaelan a parukmaen ti masansan a kasangona iti politika.

Iti official partial results ti panagbubutos maysa nga aldaw kalpasan ti eleksion, nakabutos ni Savellano iti 160,239 idinto a 95,470 ti nabutos ni Rafanan wenno iti diperensia a 64,769 a butos.

Iti pannakiuman kenkuana ti Bombo Radyo ken DWRS, maysa nga aldaw kalpasan ti eleksion, kinuna ni Gov. Chavit Singson a pinaneknekan ti kalkalpas nga eleksion a saanen a pinaallilaw pay dagiti botante kadagiti dua a dati a nasinged kenkuana iti politika.

Nagyaman ni Singson ta nalawlawagan met la dagiti umili nga awan ti kinapudno ti ibagbaga dagiti kimmontra kenkuana nga awan progreso iti probinsia.

Kinuna pay ni Singson a saan a mailibak a simmayaat ti ekonomia ti probinsia idinto a dinakamatna a manipud iti napalabas a P2 million laeng ti income ti probinsia, nagbalin itan a P200 million.

Ad-adda pay a pinasam-it ti panangdaleb ni ub-ubing a Singson iti dati a trouble shooter ti amana iti Ilocos Hotline a nangtultulong kadagiti nagkaproblema nga overseas Filipino workers kadagiti amoda ken iti trabahoda, iti panagballigi met ni Bokal Jose Bunoan a nangibalat ken ni Mel John Verzosa, anak ni Verzosa, a kinasangona para mayor iti Tagudin.

Segun ken ni Chavit, iti pannakaabak dagiti agama a Verzosa, nawayawayaanen dagiti taga-Tagudin ket sumangpeten iti ilida dagiti proyekto a saan a naipaay ti gobierno probinsial gapu iti mapapati a saan a panangipalubos ni Verzosa kadagiti barangay captains ti ipapanda panagkiddaw kadagiti proyekto iti kapitolio.

Uray iti Sta. Catalina, maibilang a baluarte ni Rafanan, nagmayoria ni incumbent Mayor Carlos Asuncion, kapartiduan dagiti Singson ket intag-ayna ti bisena ken pito a para  konsehal iti tiketna.

Adayo ti nangitarayan dagiti agabalayan kadagiti kasupangetda kadagiti dadakkel nga ili a pakairamanan ti Sinait, Cabugao, San Juan, Narvacan, Sta. Cruz, ken dagiti dua a siudad, ti Vigan City ken Candon City.

Kabayatanna, inluges met ni dati a Congressman Ronald Singson ni Atty. Bertrand Baterina iti daytoy a panagsublina manen iti politika.

Saan a karaman ti Sinait ken Magsingal, nakagun-od ni Singson iti 66,121 a butos maikumpara iti 33,514 laeng a nabutos ni Baterina wenno iti diperensia a 32,507 a butos.#