eMobile Passport Service, maisayangkat

VIGAN CITY – Maangay ti eMobile Passport Service para kadagiti agkalikagum a maaddaan iti pasaporte iti Candon City ken ditoy Vigan, daytoy ti pakaammo manipud iti opisina ti gobernador itay nabiit.

Maisayangkat ti nasao a serbisio ti panagpasaporte babaen ti panagkikinnamayet ti Department of Foreign Affairs, Gov. Ryan Singson, Congressman Eric Singson ken Candon City nga idadauluan ni Mayor Ericson Singson.

Maangay ti pre-application iti passport para iti umuna a distrito ti probinsia inton Mayo 13-14 ken iti maikadua a distrito inton Mayo 15-16.

Maigannuat met ti processing kadagiti aplikasion inton Hunio 6-8 sadiay Baluarte Function B, Salindeg, Vigan City, ken iti Candon City Civic Center.

Kinuna ni Gov. Singson a maigannuat ti nasao a serbisio tapno saan a magastuan unay dagiti aplikante nga iti napalabas ket agturongda pay iti DFA sadiay San Fernando City para iti panagaplikarda iti pasaporte.#