Empanada, inarak a gatangen dagiti turista iti Panagbenga Festival

BAGUIO CITY – Sold out ti lako nga empanada ti Ilocos Sur iti umuna pay laeng nga aldaw ti naisayangkat a trade fair kas paset ti selebrasion ti Panagbenga Festival ditoy a siudad.

Malaksid iti streetdancing competition ken ti parada dagiti sabsabong, ti Session Road in Bloom Trade Fair ti maysa kadagiti dinayo dagiti turista, lokal man wenno ganggannaet, a dimmayo ditoy a nakipagrambak iti Panagbenga Festival.

Kinuna ni Winona Santos, nangtarawidwid iti booth ti Ilocos Sur, nagustuan dagiti turista ti empanada ti probinsia ket kinasapulan pay a nagpaipaw-itda kadagiti kasapulan a ramen daytoy a produkto iti probinsia tapno adda mailakoda iti sumaganad nga aldaw ti parambak.

Kinunana a nagustuan pay a ginatang dagiti sangsangaili dagiti naiyeksibit a produkto ti probinsia a pakairamanan ti abel-iloko, chicharon, basi, bagnet, longganisa, lasona ken bawang.

Kinuna ni Santos a saan laeng a ti panagilako kadagiti produkto ti Ilocos Sur ti rantada iti pannakipasetda iti Panagbenga no di pay ti panagawis ken panangipromotda iti sumaruno a Kannawidan Festival ti probinsia inton umay a tawen.

“Itandudomi ditoy ti Ilocos Sur kas tourist destination. Adda dagiti tour package nga inyawismi para kadagiti turista ita a kalgaw,” kinuna ni Santos.

Kinuna ni Gob. Deogracias Victor Savellano nga adu ti nakitana iti parambak a mabalinnanto nga ipakat iti pestibal ti probinsia.

“Masapul nga agayabtayonto metten kadagiti exhibitors manipud kadagiti sabali a probinsia ken ili tapno umayda makipaset iti Kannawidan Festival,” kinuna ni Savellano sana innayon a “ no kayattayo a dumakkel daytoy a parambak, masapul ti partisipasion dagiti sabsabali a lugar.”

Kabayatanna, dinayaw ni Anthony de Leon, chairman ti Panagbenga, ti partisipasion ti Ilocos Sur iti parambakda.

Kinuna ni de Leon a tinawen nga adda igannuatda a baro nga inobasion iti parambak tapno ad-adu pay ti maawisda a turista.(Mancielito S. Tacadena/ NBN Vigan)