Empleada iti pawnshop, nasipdutan iti kuarta

VIGAN CITY – Agsakit la ketdi ti ulo daytoy empleada ti maysa a pawnshop no kasano a maisublina ti kuarta a natakaw iti ikutna idi aldaw ti Mayo 16.

Segun ken ni Marjobelle Parbo y Batinga, 27, naasawaan, empleada iti ACAL Pawnshop ken residente iti Barangay Maas-asin, Magsingal, kairuruarna ti P100,000.00 a pinaiwitdro ti pagpapaayanna a pawnshop manipud iti Philippine National Bank, ditoy siudad, ket bayat ti pannagnana iti Florentino Street, Barangay 1, iti amiananen ti Two Brother’s Grocery idi kellaat a maysa a babai ti nagsardeng iti sanguananna idinto a sabali pay a babai ti nangdungpar iti likudanna.

Naduktalan laengen ti biktima nga awanen ti pouch a nangikabilanna iti kuartana iti uneg ti bagna bayat ti kaaddana iti Octagon Computer Shop.

Kiniddaw dagiti polis iti akinkukua iti groseria ti panangitedna iti footage manipud iti CCTV a nainstolar iti pasdek para iti posible a pannakabigbig dagiti mannipdut.#