VIGAN CITY – Maysa nga empleado ti nakursonadaan ti uppat a lalaki a puon ti nakayospitalanna.
Nabigbig ti biktima a ni Eugenio Pablico, 34, naasawaan, agnaed iti Cadre, Tamag, agtrabtrabaho iti kompania ti softdrinks.
Saan a nainaganan dagiti nangkursonada kenkuana.
Segun iti inbestigasion, mapan agreport ti biktima iti pagtrabahuanna iti agsapa idi inayaban dagiti suspetsa nga uminom.
Apagtugaw ti biktima, kinugtaran ti maysa ti tugaw a puon ti nakatulidanna a sinaruno ti pannakadisnog ti rupana.
Naipan ti biktima iti Gabriela Silang General Hospital para iti pannakaagasna.
Saan a nabirokan dagiti nagresponde a polis dagiti suspetsa.