Empleado ti Bantay, agsueldodanton babaen ti ATM

BANTAY, Ilocos Sur – Maysa a resolusion ti inaprobaran ti konseho ditoy a sumrek ni Mayor Sammy Boy Parilla iti katulagan iti maysa a bangko para iti pannakaipasdek ti ATM payroll system ditoy nga ili.

Sagudayen ti resolusion ti pannakaited iti otoridad ken ni Parilla a makitulag iti Land Bank of the Philippines para iti pannakaipasdek ti ATM payroll system ditoy nga ili.

Babaen iti daytoy a sistema ti payroll, nadardaraston ti panagsueldo dagiti empleado ta maaladanton ti  sueldoda iti babaen ti automated teller machine (ATM).

Maipasdek ti ATM iti asideg ti munisipio tapno saanton nga umadayo dagiti empleado nga agiruar iti kuartada.

Daytoy ti umuna a kiniddaw ni Mayor Parilla iti sangguniang bayan ditoy iti umuna a lawas a panagtugawna nga ama ti ili.#