Empleado ti munisipio, ginudas kinadadona a polis

NARVACAN, Ilocos Sur – Napilaan iti kaso ti maysa a polis gapu iti panangpaltogna iti maysa nga empleado ti munisipio sadiay Barangay San Pablo ditoy nga ili idi parbangon ti Hulio 11 a puon ti nakatayanna ken nakasugatan iti tallo pay.

Naiyendorso iti opisina ti provincial prosecutor ti kaso a murder ken frustrated murder maikontra ken ni PO2 Rolly Quinit y Cabiles, 36, naasawaan, PNP member iti Narvacan Police Station, ken residente iti Barangay Orence, Narvacan gapu iti panangpaltogna ken ni Francisco Soria y Cachola, 48, naasawaan, municipal employee, ken residente iti Barangay Sta. Lucia, Narvacan, iti maysa a natayan iti nadakamat a barangay idi agarup 12:30 ti parbangon ti Hulio 11.

Nagramut ti pammapatay iti panagsubang da Quinit ken ni Soria bayat ti panagsusugalda iti dado iti maysa a natayan iti nadakamat a barangay.

Dagus a natay ni Soria gapu iti sugatna iti ulona.

Tallo pay ti nasugatan iti pammaltog a pakaibilangan da Alex Cantoria y Palacpac, 52, balo, residente iti Barangay Sta. Lucia; ni Dave Moises ken ni Victor Cordero y Cabuloy, agpada a residente iti Barangay San Pablo, ditoy met laeng nga ili.

Napadamgisan iti sugat iti makannawan a siko ni Cantoria; napadamgisan iti shrapnel ti ulo ni Cordero idinto a naglak-am iti makannawan a mid auxiliary area ni Moises ket naitarayda amin iti Ilocos Sur District Hospital sada naiyalis iti maysa nga ospital iti Vigan City.

Iti inisial a panagimbestiga dagiti polis, bayat ti dado iti maysa a natayan, adda naparnuay a di panagkinnaawatan da Quinit ken Soria.

Naggawid ni Quinit ngem sumagmamano a minutos, nagsubli a nakaarmas ket idi nakitana ni Soria ken kakaduana nga aggiinom iti likud ti kabalbalayan, pinaltoganna iti sumagmamano a daras ti biktima a nakatayan a dagus daytoy ken nakasugatan dagiti tallo a kain-inom daytoy.

Naglibas ni Quinit iti saan nga ammo a direksion kalpasan ti pammaltog.
Mapapati a 5.56MM armalite rifle ti naaramat iti pammaltog kas maibatay kadagiti nasarakan a kapsula iti crime scene.#