Empleado ti seguro, naaresto iti buy bust operation

CANDON CITY – Balligi ti insayangkat dagiti polis ditoy siudad a buy bust operation maikontra iti maysa nga empleado ti seguro idi sardam ti Nobiembre 14.

Naikustodia ni Rodel Maduli y Acena, 30, baro, empleado ti People’s General Insurance, iti police station idinto a maisagsagana ti kaso maikontra kenkuana.

Insayangkat dagiti polis ditoy siudad iti panangidaulo ni PSupt Marlo A. Castillo, COP, ken iti koordinasion ti PDEA ken PAIDSOTG ti buy bust operation sadiay Barangay Tocgo maikontra ken ni Maduli idi agarup 7:20 ti sardam ti Nobiembre 14 a nagpammarangan ti maysa nga operatiba a gumatang iti droga manipud iti suspek.

Narekobre dagiti polis iti ikut ti suspek ti dua a P500.00 ken maysa a P1,000.00 a naaramat iti buy bust operation.

Nakakumpiskada pay iti tallo a pedaso ti elongated heat-sealed transparent plastic a naglaon iti mapapati a shabu, 11 pedaso nga awan naggianna a plastic sachets, maysa a plastic straw a mapapati nga addaan shabu residue, 3 a disposable lighter, 9 a P500.00, maysa a P100.00, ken maysa a P50.00 a mapapati a naglakuan ti suspek iti droga.

Segun iti polis, makalawas a sinipsiputanda ti suspek babaen ti tulong dagiti kameng ti Barangay Intelligence Network gapu iti mapapati a panaglakona iti droga.#