Bimmaba dagiti rebelde a komunista tapno agdawat iti makan: militar
SAN JUAN, Ilocos Sur – Maysa a soldado ti napasag idinto a mapapati nga adda nasugatan a kameng ti New People’s Army iti engkuentro a napasamak iti nagbaetan ti dua a grupo iti maysa a sitio iti nagbedngan ti Cabugao, Ilocos Sur ken daytoy nga ili itay nabiit.
Nainaganan ti natay a soldado a ni PFC Elmer Antonio, kameng ti 50th Infantry Batallion, Philippine Army a nakabase iti Guimod Sur ditoy.
Segun ken ni Col. Harold Cabreros, commanding officer ti 50th IB, PA, nagpaut ti rinnupak iti uppat nga oras.
Kinunana a nagresponde dagiti soldado kalpasan a nakaawatda iti impormasion manipud iti maysa a sibilian nga aganay a 20 a rebelde a komunista ti nakita dagiti lumugar nga agdakdakiwas iti sitio Caset a nagbeddengan ti Barangay Maradudon, Cabu-gao, Ilocos Sur ken ti Nagculluoban, Sinait, Ilocos Sur.
Mapapati a napuntaan ni Antonio iti umuna a ranipak dagiti paltog manipud kadagiti komunista a gerilia.
Patien ti tropa ti gobierno nga adda naidasay wenno nasugatan a kameng ti rebelde a komunista agsipud kadagiti tedted ti dara a nakitada iti nagpuestuan dagitoy.
Madama ti mapping up operations dagiti soldado kadagiti naglibas a kameng ti NPA.
Kabayatanna, maysa a drum a naglaon kadagiti armas ken subersibo a dokumento ti nasarakan ti Philippine Army a mapapati nga impakni ni Renato Amulot a.k.a. Ka Deo, agdama a front secretary ti KLG de Lara Command idiay Bantay Ambiaget, Barangay Baracbac, Galimuyod, Ilocos Sur.
Naglaon ti dram iti tallo nga M-16 rifles a maysa kadagitoy ti baby armalite, 5 a bandoliers, 22 short ken 4 a long magazines para iti M-16, 7 a rounds para iti M203 grenade launcher, wires nga addaan iti female fuse, 3 pedaso a blasting caps, 2 a bateria, timing device, 2 metro a detonating cord, 3 pedaso a kandela, 1 a lighter, 4 a voltage regulators, ken 12 pedaso ti compact discs a naglaon kadagiti kontra gobierno a mensahe ken subersibo a dokumento.
Aganay laeng a 200 metro ti kaadayo ti Bantay Ambiaget iti nagpanawan a kampo dagiti kameng ti NPA.
Mapapati nga imbati dagiti naglibas a kameng ti NPA dagiti armas ken ramramit a pagbomba gapu agtultuloy a nainget a combat operations ti militar. (Karaman ti report ni Danny Antalan)
