Footer

Entrada iti tiendaan publiko ti Candon, ngimmato iti 2009

CANDON CITY – Aganay P300,000 ti ngimmatuan ti ticket collection ti tiendaan publiko ditoy siudad idi 2009 no ikumpara iti napalabas a tawen, daytoy ti impakaammo ni Albert Abaya, market administrator bayat ti interbio kenkuana ti DZTP Radio Tirad Pass itay nabiit.

Segun ken ni Abaya, agdagup iti P3,464,505 ti nasingiran ti tiendaan idi 2009 idinto a P3,191,801 ti nasingiranna idi 2008 wenno immadu iti P272,704.

Kinuna ti market administrator nga iti tawen 2009, ti bulan ti Mayo ti kangatuan iti nasingiran ti tiendaan nga immabut iti P311,715 iti makabulan idinto a kababaan ti bulan ti Oktubre nga immabut laeng iti P235, 885.

“Nangatngato ti nasingiran idi Mayo agsipud ta iti daytoy a bulan ti panagsangpet dagiti produkto-agrikultura, idinto a saanen a ti tiendaan ti nagbayadan dagiti naglako ti prutas ken paputok iti Disiembre,” panangilawlawag ni Abaya..

Kinuna ni Abaya a ti Oktubre ti kababaan ti nasingirda agsipud iti idadalapus ti bagyo Pepeng a nakaapektaran dagiti negosio iti siudad.

Ti koleksion iti 2009 manipud iti entrada ti kangatuan pay laeng no ikumpara kadagiti napalpalabas a tawen, kinuna ni Abaya.#