Epekto ti climate change iti industria ti nateng, natratar

VIGAN CITY – Ti panangrupak iti epekto ti panagbaliw ti klima iti industria ti tabako ti maysa kadagiti naipangruna nga isyo a natratar iti maysa a simposio a naangay ditoy siudad idi Nobiembre 25-26.

Kinuna ni Vice Gov. Deogracias Victor “DV” Savellano a kasapulan a malapdan ti climate change gapu iti dakkel nga epektona kadagiti mula a nateng ditoy rehion.

Innayon ni Savelano a kasapulan ti panagsagana dagiti amin a sektor iti panagbaliw ti klima sakbay a maladaw ti amin.

Karaman a dimmar-ay iti Regional Vegetable Symposium dagiti mannalon manipud iti Pangasinan, La Union, Ilocos Sur ken Ilocos Norte.

Kangrunaan a napagpapatangan iti dua nga aldaw a taripnong dagiti mannalon ti organic agriculture ken Agri-P-NOY Program, climate change, good agricultural practices on vegtable farming, new development and policies under the HVCC Program, convergence techno demo, problems and issues of the industry, priorities para iti 2011.

“Agyaman ti gobierno probinsial ti Ilocos Sur iti Departamento ti Agrikultura iti Rehion Uno ta napanunotda daytoy a symposium tapno malawlawagan dagiti mannalon a saanda a mailaksid iti epekto ti panagbaliw ti panawen,” kinuna ni Savellano.

Kinunana a maiyataday  daytoy iti programa ti administrasion ni Gov. Luis “Chavit” Singson a pannakapasayaat ti agrikultura iti probinsia tapno adda umdas a suplay ti taraon para kadagiti umili.

“Napateg dagiti mannalon. No awanda, saanko nga ammon no ania ti mapasamak. Espesialda a klase ti tao ta mabasada pay ti panawen ti panagtutudo. Babaen laeng ti panangamiris iti aglawlaw, ammodan no tiempon ti panagitukit iti bukel,” innayon ti bise gobernador.

Dimmar-ay pay dagiti seed companies iti simposia ket impakita ken inlawlawagda ti kalidad dagiti lakoda a bukel a bin-i.#