Epekto ti Covid-19 iti edukasion

Education Secretary Leonor Briones graced the kickoff ceremony of the National Schools Press Conference

NAISANUDEN agingga inton Hulio 15, 2020 ti panagenrol dagiti sumrek nga agadal iti grade school tapno maikkan iti napapaut a gundaway dagiti nagannak a mangiparehisto kadagiti agbasa nga annakda para iti daytoy nga school year a manamnama nga aglukat inton Agosto 24, 2020.

Naggibus koma ti enrollment itay Hunio 30, 2020 ngem pinaisanud ni Education Secretary Leonore Briones agingga inton Hulio 15, 2020 ta basbassit nga amang dagiti nakaenrolen ngem ti nasurok a 27 milion nga estudiante a nagenrol itay napalabas nga school year.

Maibasar iti report ti Department of Education sakbay ti Hunio 30, agarup 17 million pay laeng dagiti nakaenrol iti Kindergarten agingga iti Grade VI ken agarup innem a million pay laeng dagiti nakaparehisto para ti Grade 7 – Grade 12 wenno Junior – Senior High School. No dagupen ti bilang dagiti immuna a nakaenrol ket basbassit iti sumurok-kumurang nga innem a million no maidasig kadagiti nagadal iti grade school iti napalabas a tawen. Agarup 70-80% kadagiti nakaenrolen ket iti pangpubliko a pagadalan, ken ti nabati a porsiento ket kadagiti pribado a pageskuelaan. Nagsuek ti bilang dagiti nakaenrolen iti daytoy a tawen, nangruna dagiti agbasa kadagiti private schools.

Dayta a bilang ket iyanninawna ti nakaro a dakes nga epekto ti napaut a community quarantine gapu iti panagraira ti Coronavirus 2019 iti Pilipinas. No awan ti Covid-19 pandemic, nanglukat koma ti school year idi Hunio 1, 2020, ngem naitantanen daytoy ken dandani pay saanen nga aglukat ti klase no saan a naallukoy ti DepEd ni Presidente Rodrigo Duterte a nangirakurak a saanna nga ipalubos nga aglukat ti klase agingga nga awan ti matakuatan a bakuna iti Covid-19.

Nagbaliw ti panunot ni Presidente Duterte kalpasan a nakombinsir ti DepEd a ti wagas ti panagklase ket saan a “face to face learning” ngem “blended learning.” Mausar ti “online learning babaen ti panagusar kadagiti computer, tablet, cellphone ken dadduma pay a moderno a gadget. Naisingasing pay ti pannakaaramat ti media babaen iti radio ken telebision, ken babaen dagiti maisagana a modules.

Immunan a naipakat ti online enrollment kadagiti agadal ita nga school year ngem nababa ti bilang dagiti nagparehistro gapu ti kinaawan ti internet connection dagiti nagannak, nangruna kadagiti
nasulinek a disso a narigat ti signal. Nagangayanna, nagpatulong ti DepEd kadagiti opisial ti barangay a nagiwaras kadagiti registration forms kadagiti kalugaranda.

Dayta a pagteng ket ipaneknekna ti kinapudno a saan pay a nakasagana dagiti adu a nagannak ken adu a lugar iti pagilian para iti “online learning” ta narigat pay ti panagpaenrol, ad-adda a natutuokto manen no panagklase iti internet. Adu pay laeng dagiti nagannak dagiti awan ti cellphone wenno awanan iti internet connections. No adda man signal wenno internet connections ket nabuntog ken agputedputed pay. Nangina met ti bayad iti panagpakonekta iti internet ket adu pay laeng a nagannak dagiti saan a makabael nga agbayad.

Iti panagpababa ti bilang dagiti nagenrol ita a tawen no maikompara itay napalabas nga school year ket ipaneknekna pay ti rimmigat a kasasaad dagiti nagannak nangruna dagiti naawanan iti trabaho ken pagsapulan gapu iti community quarantine.

 Kadagiti nakaenrolen, adu kadakuada dagiti naggapu kadagiti pribado a pagadalan dagiti immakar kadagiti pampubliko nga eskuela. Dakkel ti bimmabaan ti bilang dagiti nagenrol kadagiti private schools ken daytoy ket apektaranna ti kasasaad dagiti eskuela a posible nga adunto dagiti mangrikep no saan a saranayen ida ti gobierno.

Saanen a makakellaat no nababbaba ti bilang dagiti agenrol ita nga school year gapu iti agdama a kasasaad ti nadaleb nga ekonomia ti pagilian gapu iti Covid-19, ngem nasken nga ikagumaan latta koma dagiti nagannak nga isakad ti panagadal dagiti annakda tapno saan a masayang ti maysa a tawen no agsardengda nga agbasa.

Adda dagiti mangtagtagibaba iti “blended learning” nga idiaya ti DepEd. Adu dagiti saan a kombinsido a nakasaganan ti DepEd para iti “blended learning” ta maibasar iti surbey, agarup 50 porsiento laeng dagiti makaammo iti panagusar ti computer a kangrunaan a kasapulan iti online learning. Para kadagiti dadduma a nagannak, saan nga epektibo daytoy a wagas gapu ta maibilang nga eksperimento pay laeng ta damona ti nainsaknapan a maipakat ket posible a limitado laeng ti maadal wenno masursuro dagiti agbasa, ket nasaysayaat laengen a pagsardengenda ti panagadal dagiti annakda agingga a saan nga aggibus ti krisis a pinarnuay ti Covid-19.

Napateg unay ti edukasion tapno mapatalgedan ti naraniag a masakbayan dagiti ubbing ken agtutubo nga isuda ti pangnamnamaan ti pagilian. Para kadagiti kaaduan a nagannak, ti edukasion ti kapatgan a sagut a maipatawidda kadagiti annakda a saanto a pulos a maagaw wenno mapukaw kabayatan ti panagbiagda.

Ti kinapateg ti edukasion ti puon ken gapu nga adu dagiti nagannak ti mangaramid iti amin a kabaelanda tapno maisakadda ti panagbasa dagiti annakda manipud iti elementaria agingga iti agturposda iti kolehio.

Narigat man ti agdama a kasasaad ti panagbiag dagiti Pilipino gapu iti krisis, ngem saan koma a dayta ti makatubeng tapno saanda a pagbasaen dagiti annakda. Adu dagiti wagas ken pamuspusan tapno maituloy dagiti annakda iti agbasa.

Kadagiti maud-udi nga aldaw sakbay ti panagpatingga ti panagenrol, ikagumaan koma dagiti nagannak nga ipalista nga agbasa dagiti annakda, ken isakadto ti panagadalda tapno nataltalged ken naranraniagto ti masakbayanda. â—Ź