Eric Singson Jr., naisandi a kandidato para diputado iti 2nd District ti Ilocos Sur

VIGAN CITY- Sabali pay a Singson ti timmapog iti politika kalpasan ti panangisanud ti inana ti kandidaturana para iti kinadiputado iti maikadua a distrito ti Ilocos Sur.

Idi Disiembre 16, intuding ti Commission on Elections a Substitution Day, insanud ni dati a Congresswoman Grace Singson ti kandidaturana ket naisandi ni Eric Singson Jr., a kandidato ti Lakas Kampi-CMD para iti kinadiputado iti maikadua a distrito ditoy probinsia.

Agtawen ni Eric Singson, Jr. iti 34 ken baro pay.

Ni Mayor Allen Singson, kabsat ni Eric, ti agdama a mayor ti siudad ti Candon ket agpailayon iti eleksion inton Mayo 2010.

Maysa met la a Singson, ni Konsehal Alfonso Singson, kabsat ni Dip. Singson, ti katiket ni Mayor Singson para bise mayor iti Candon City.

Iti Narvacan, agpailayon met ni Vice Mayor Charito Singson-Zaragosa para iti nasao a puesto.

Insanud ni Mayor Edgar Zaragoza ti kandidaturana para kinamayor idi sustitution day ket naisandi ni Bokal Zuriel Zaragoza.

Awan kasango dagiti agina.

Maysa pay a Zaragoza, ni Charmian Wyanet, ti opisial a kandidato ti Lakas Kampi-CMD para bokal iti maikadua a distrito.

Kabayatanna, opisial a kandidato ti Lakas Kampi-CMD para gobernador ni Deputy National Security Adviser Luis Singson.

Iti panagkandidato ti politikal kingpin, nagpababa ni Gov. Deogracias Victor Savellano a para bise gobernador ken ni Vice Governor Jeremias “Jerry” Singson a para bokal.

Iti met siudad ti Vigan, awan kasango ni Ryan Luis Singson, anak ni “Chavit” Singson para bise mayor.

Awan met ti makaitured a sumango ken ni agdama a Mayor Eva Marie Singson- Medina nga agpailayon kas mayor gapu kadagiti adu a nagapuananna iti panagdur-as ti Vigan City kas sentro ti negosio ken tourist destination iti Amianan.

Iti Caoayan, kandidato a para mayor ni Germie Singson-Goulart, kabsat ni Usec Singson.#

Baro a pasdek iti CISDH, nainaguraran

NARVACAN, Ilocos Sur – Nailukat iti publiko ti baro a pasdek ti Central Ilocos Sur District Hospital ditoy nga ili kalpasan ti pannakabendisionna idi Disiembre 12.

Immabot iti nasurok P4 milion ti pategna ti pasdek nga addaan iti pito a kuarto a naggapu ti pondona iti Department of Health babaen ti inisiatibo da Gov. Deogracias Victor “DV” Savellano ken LMP President, Ilocos Sur Chapter ken Narvacan Mayor Edgardo Zaragoza.

Simmangpet metten dagiti nadumaduma a ramit nga aggatad iti P2.5 milion para iti baro a pasdek.

Segun ken ni Dr. Pablo Quedado, mangidaulo iti CISDH, paset daytoy ti Hospital Enhancement Program ti
DoH a naaprobaran para iti nadakamat a balay-pagagasan.

“Daytoy a balligi ti CISDH ket maysa a mangipakita iti napintas a panagdadanggay dagiti empleado ti ospital, ti gobierno probinsial ken ti lokal a gobierno ti Narvacan,” kinuna ni Quedado.

Kinuna met ni Zaragoza a daytoy ti mangikkat iti naalas a pangaw-awag dagiti surdo iti CISDH a maysa a “hospatay”.

Kanaig daytoy, impakaammo ni Savellano ti pannakaruk-at ti nasurok P400 milion a provincial health investment ti probinsia para iti pannakapasayaat dagiti walo a district hospitals ti Ilocos Sur kasta metten dagiti RHUs ti tunggal ili.

Inwaragawag pay ti gobernador ti baro a programa ti probinsia a maaddaan iti Philhealth cards dagiti indigent families a saan pay a naiparehistro iti babaen Dur-as ken Virtud iti Benneg ti Salun-at dagiti Ilocano.#