Eroplano, mapagbalin a panganan

SAN ILDEFONSO, Ilocos Sur – Manamnama nga agbalin a dakkel a pangawis iti turista ti daan nga eroplano a naikabil iti asideg ti munisipio ditoy nga ili.

Naammuan a natinnag ti nasao nga eroplano iti kabaybayan a sakup daytoy nga ili ket pinayaon ti kompania tapno mapagbalin nga scrap.

Nupay kasta, babaen ti kiddaw ni Mayor Mark Purisima, naited daytoy nga awan ti nabusbos ti ili malaksid iti pannakaibiahena tapno mapagsasaip dagiti nadumaduma a pasetna tapno agbukel nga eroplano.

Segun ken ni Purisima, apaman a mapasimpa, madalusan ken mapintaan ti eroplano, mapagbalin daytoy a restaurant.

Impalgak pay ni Purisima nga agaruatto dagiti agserbi iti nasao a restaurant iti uniporme ti stewardess ket manamnama a mangipaay daytoy iti pamastrekan iti ilina, malaksid ti pannakaidur-as ti turismo ditoy.#