Tawid News Magazine

Parangrangen ti espiritu ti community pantry

“MANGTED no ania ti kabaelan, mangala no ania ti kasapulan.”

Iyanninaw dagita a balikas a nakapaskil kadagiti “community pantry” ti panagtinnulong ken saan a panagbukbukod iti panawen nga aglaklak-am iti nakaro a panagbisin ken rigat dagiti adu a Pilipino nangruna dagiti napanglaw ita a panawen ti pandemia ti Coronavirus Disease 2019.

Panagkikinnaasi ken panagbibinnuray ti panggep ti agsaksaknapen a “community pantry” iti nagduduma a paset ti Pilipinas kalpasan nga inyusuat ni Ana Patricia Non babaen ti Maginhawa Community Pantry sadiay Teacher’s Village, Quezon City kabayatan ti panagsagaba dagiti adu nga agindeg iti dayta a komunidad.

Nangrugi ti pantry babaen ti panagtitinnulong dagiti agnaed iti dayta a komunidad. Adda dagiti boluntario a nangidonar kadagiti nateng, bagas, itlog, grocery items ken dadduma pay a taraon ken kangrunaan a kasapulan. Dagiti agkasapulan ket mabalinda ti mangala kadagiti apagapaman a kasapulanda unay, ken mabalinda met ti mangiburay iti kabaelanda uray ania a kasapulan iti padada a tao.

Iti panag-trending wenno panaglatak iti social media dayta nga umuna a community pantry, ket nagadu dagiti natukay ti pusoda a nangiburay kadagiti adda kadakuada a pakairanudan met dagiti nagadu a tattao a mapan makipila iti nakaat-atiddog tapno makadawatda iti libre a taraon ken dadduma pay a kasapulanda iti inaldaw. 

Iti ababa laeng a panawen ket kasla nagwaras nga apuy ti community pantry iti nagduduma a paset ti Metro Manila ken uray kadagiti probinsia nga adu dagiti mabisbisinan ken agkasapulan iti tulong kabayatan iti nasuroken a makatawen a pandemia.

Ti natan-ok a panggep ti community pantry ket isarmingna ti nasayaat a galad dagiti mamati iti Dios nangruna dagiti Kristiano ken Pilipino a managburay kadagiti adda kadakuada a grasia. Adu latta a Pilipino dagiti manangaasi ken managtulong iti panawen ti rigat ken didigra.

Iti laksid nga adu a Pilipino dagiti mangraraem ken ni Non iti panangiyinaw ken panangiyusuatna ti umuna a community pantry iti Pilipinas ket napagatapan isuna nga adda pannakainaigna kadagiti komunista. Inyebkas ni Non ti sakit ti kaungganna idi napagsaludsodan kabayatan ti online press conference idi napagdadamagan no adda koneksionna kadagiti komunista a nangpasingkedanna nga awan ti pannakainaigna.

Iti nasuroken a makatawen a pandemia ket minilion a Pilipino dagiti naawanan iti trabaho ken pagsapulan. Adda man dagiti nagduduma nga ayuda nga ipapaay ti gobierno, ngem saan amin a makasapul ket mawarasan. Adda man tulong a maipaay kadagiti marigrigat ngem saan nga umanay ken agpaut nangruna kadagiti pamilia nga adu dagiti kamengna.

Dagiti agindeg sadiay Quezon City, Metro Manila a nakaipasngayan ti Maginhawa Community Pantry ket naglak-am manen iti enhanced community quarantine itay naglabas, ket ti rigat a linak-am dagiti agindeg sadiay Teacher’s Village ti nangipaay ti inspirasion ken ni Non tapno nainaw ken naipasngay ti umuna a community pantry.

Uray no adda financial aid nga ipaay ti gobierno ket adu nga umili dagiti saan a nakaawat. Nakalkalddaang a buya ti kaadu dagiti makipila iti panagiwaras ti pondo ti special amelioration program a pagiinnapalan dagiti tattao. Mano met laengen ti kaibatogan ti P1,000 ti tunngal indibidual nga agpatingga iti P4,000 iti kada pamilia? 

Naindaklan a tulong kadagiti agkasapulan dagiti taraon a maala kadagiti community pantry tapno mailasat ti maminsan wenno agmalem a pannangan dagiti napanglaw.

Naindaklan a pagyamanan dagiti benepisario dagiti community pantry ken ni Non ken dagiti adda iti likudan dagitoy a gannuat ta kasapulan unay ti tulong dagiti adu a marigrigat ken mabisbisinan gapu ti pandemia.

Ipaneknek ti panagadu dagiti community pantry nga uray iti agdama a panawen ti pandemia, tuok ken rigat ket adu pay laeng dagiti pribado a tattao a madadaan a tumulong kadagiti padada a tattao ta saan nga umanay ti ayuda nga ipapaay ti gobierno.

Saan la ket ngarud a mailibak nga adda dagiti dadduma nga opisial ken agserserbi iti gobierno dagiti magtagidakes wenno mangtagibassit kadagiti community pantry. Adda dagiti naalikuteg ken managatap ti pampanunotda ti mangipapan a dagiti dadduma a mangiyus-usuat ti community pantry ket adda dagiti nalimed a panggepda wenno adda pannakainaigda kadagiti komunista. Dayta ti gapu nga adu dagiti narurod iti “red tagging” ken ni Non ken dagiti dadduma pay a nangiyusuat kadagiti community pantry.  

Adu dagiti mamati a ti panagadu dagiti community pantry iti nagduduma a lugar iti Pilipinas ket iyanninawna ti panagkurang ti serbisio ti gobierno tapno saranayenda dagiti umili nangruna dagiti napanglaw a kangrunaan a naapektaran iti pandemia. Nagrigat la ngaruden ti kasasaad ti panagbiag, nguminngina pay ti presio dagiti kangrunaan a taraon.

Imbes nga apalan wenno agsintir dagiti dadduma nga opisial ti gobierno kadagiti bassit a tulong nga ipapaay dagiti community pantry, nasaysayaat pay koma no suportaranda ida tapno ad-adu dagiti matulongan a Pilipino.

No laeng koma mausar dagiti pondo ken resources ti gobierno iti umno a wagas ket ad-adu pay koma dagiti matulongan. No mismo koma a dagiti maseknan nga ahensia ti gobierno ti manggatang ken mangbunag kadagiti madaddadael a nateng, prutas ken dadduma pay a produkto manipud kadagiti probinsia ket maidanonda kadagiti siudad, adu koma a napanglaw dagiti mabenepisiaran.

No nasayaat koma ti pannakaiwaras dagiti ayuda nga ipapaay dagiti nagduduma nga ahensia kadagiti pudno nga agkasapulan ket nalaglag-an koma ti rigat a sagsagabaen dagiti tattao. No maibiag koma dagiti kaaduan a Pilipino nangruna dagiti agserserbi iti gobierno ti espiritu ti community pantry – ti panagsisinnaranay ken panagbibinnuray – iti amin a tiempo ket dumur-as ti biag iti Pilipinas.


Exit mobile version