Establisimiento, maparitan nga agited iti candy, tsokolate kas sukli dagiti produkto

VIGAN CITY – No lumsot daytoy nga ordinansa iti sangguniang panlungsod, maited ti supli a kuarta iti aniaman a produkto a magatang kadagiti amin nga establisimiento ditoy siudad.

Daytoy ti bugas ti ordinansa a pinutar ni Konsehal Kisses Marquisse Agdamag kalpasan nga adda dagiti naidanon kenkuana a reklamo manipud kadagiti aggatgatang a candy wenno tsokolate ti ited dagiti business establishments no adda sukli ti gatangenda kadagitoy a pasdek-negosio.

Adda pay dagiti report a maysa a botika ti agsupli iti tableta kas iti paracetamol kas sukat ti supli dagiti agas a gatangen dagiti consumers.

“Protektaran daytoy nga ordinansa ti buying public ta awanton ti business establishment nga agsupli iti candy wenno chocolate, no di laeng kuarta iti eksakto a kantidad,” kinuna ni Agdamag.

Kinuna ti konsehala a nagbalinen a kaugalian daytoy iti manon a tawen ket mangnamnama a babaen iti daytoy nga ordinansa, maisardeng daytoy nga aramid.

Ngem kinuna ni Konsehal Benjo Versoza a kas kapaliiwanna, nakisang dagiti sensilio nga iruruar dagiti bangko a pagsupli dagiti pasdek-negosio.

Innayonna a mapanda pay agpasupli iti sensilio kadagiti gasolinaan tapno laeng adda pagsuplida iti eksakto a kantidad dagiti magatang a produkto iti establisimientoda.

Ngem segun ken ni Agdamag, impasingked dagiti bangko nga awan ti shortage iti coins, ti laeng problema ti pannakaiwardas ti suplay kadagiti business establishments.

Kinuna pay ni Agdamag nga addan national law a mangiparit kadagiti business establishments a mangsupli iti candy wenno tsokolate kadagiti gatangen dagiti consumers ket kasapulan a maiyimplementar daytoy para iti proteksion dagiti consumers.

Kas ituding ti ordinansa, adda multa a maipataw kadagiti aglabsing, segun iti konsehala.

Kabayatanna, impakaammo ti Bangko Sentral ng Pilipinas-Dagupan Branch nga adda aganay 21 billion a sensilio nga agsirsirkulo iti pagilian ket no bingayen daytoy iti populasion, adda aganay 250 a sensilio iti ikut ti tunggal umili.

Inwaragawag daytoy ti BSP-Dagupan kas reaksionna kadagiti reklamo manipud kadagiti consumers a candy, tsokolate wenno ania ditan a produkto ti maited kadakuada, imbes a kuarta ti maited a supli dagiti gatangenda a produkto.
Kinuna ni Analiza Catan, senior research specialist ken information officer ti BSP-Dagupan nga iti kadagupan a 21 billion a sensilio, 56 porsiento kadagitoy ti P.25 ken nababbaba a kantidad idinto a 44 porsiento dagiti coins a P1.00, P5.00 ken P10.00.

Linagidaw ti BSP ti ugali dagiti Filipino nga agidulin kadagiti sensilio iti tubong wenno alkansia idinto nga indagadagna nga usaren koma dagiti umili dagiti sensilio tapno agsirkulo dagitoy ket maited kadakuada ti umisu a supli no gumatangda kadagiti produkto.

Kinuna pay ti BSP-Dagupan a dakdakkel ti mabusbos ti gobierno iti panagpartuartna kadagiti sensilio.

Kabayatanna, madama a matrattratar iti Kamara ti maysa a gakat a mangiparit iti panagilemmeng iti sensilio.

Sagudayen ti House Bill 2411 dagiti akto a maibilang a panagilemmeng wenno hoarding iti coins, no kasano kabayag nga adda iti ikut ti maysa a tao dagiti sensilio ken no mano dagiti maipalubos nga ikutanna a sensilio.#