Estudiante, bimmagsol gapu ta dina nagustuan nagkanta iti videoke

STO. DOMINGO, Ilocos Sur – Saan a nagustuan daytoy nga estudiante ti panagkanta ti maysa a sangaili iti videoke bayat ti selebrasion ti kasangay isu a bimmagsol.

Napasamak daytoy pammagsol sadiay Barangay Nalasin, ditoy nga ili idi agarup 11:30 ti rabii idi Oktubre 23 iti balay ti maysa a Noel Tulbera a nakaangayan ti selebrasion.

Binagsol ni Rustom Lacaden y Racca, 18, baro, estudiante, ken residente iti Barangay Maynganay Norte, Sta. Maria, Ilocos Sur, ni Oliver Molina y Tulbera, 21, naasawaan, laborer, residente met laeng iti Barangay Nalasin.

Kas maibatay iti blotter, bayat ti panaggiinom da Lacaden, Molina ken dadduma pay a kakaduada, nagkanta iti videoke ni Michael Molina y Tulbera, 45, ama ti biktima, ngem mapapati a di nagustuan ni Lacaden ket inasutna ti imukona sana ginandat a bagsolen ti agkankanta.

Sinalakniban ti ub-ubing a Molina ti amana ngem nabagsol ti akinbaba a paset ti tianna.

Naitaray ti biktima iti Gabriela Silang General Hospital, Tamag, Vigan City idinto a naipan iti police station ti suspek.#