STA. CRUZ, Ilocos Sur – Estudiante pay laeng daytoy suspek ngem nakurang ti panagraemna iti pannakabagi ti linteg.
Gapu iti mapapati a panangkaritna iti maysa a polis, naiyendorso iti opisina ti provincial prosecutor a makasuan iti direct assault and physicial injuries ni Danilo Rafanan, Jr. y Raras, 18, baro, estudiante ken residente iti Barangay Villa Hermosa ditoy nga ili.
Nagramut ti kaso idi pinasardeng ni PO1 Venson Habon, 25, residente iti Barangay Casilagan ditoy nga ili ni Rafanan a nagmaneho iti nangisit a Honda TMX bayat nga agturong iti abagatan a direksion agsipud ta awan ti aruatna a helmet.
Kiniddaw ni Habon nga ipakita ni Rafanan ti lisensiana ngem idi agturong iti Police Assistance Center tapno matiketan ti motorista, mapapati a dinungso ti lugan ni Rafanan ti likudanna.
Idi dinamag ni Habon no apay a dinungso ni Rafanan, mapapati a nag-asta ketdi daytoy a makiranget.#