Estudiante, nagandat ti biagna

VIGAN CITY – Maysa nga estudiante ti ginandat a patayen dagiti lalaki a nagkalubbon iti motorsiklo sadiay Governor A. Reyes Street, Barangay VIII, ditoy siudad idi parbangon ti Hulio 26,

Naitaray iti Metro Vigan Cooperative Hospital, Bantay, Ilocos Sur ni Jeoffrey Dangsil Blas, 25, baro, automotive student, ken natibo iti Barangay Tiempo, Tubo, Abra ken agdama nga aggigian iti Barangay Puspose, Bantay, Ilocos Sur, ngem napalubosan met laeng agsipud ta damgis laeng ti sugatna iti makannawan nga abagana.

Iti panagimbestiga dagiti polis, idi agarup 2:00 ti parbangon ti nadakamat a petsa, agdaldaliasat iti Governor A. Reyes, Barangay VIII, Vigan City iti agpaamianan a direksion ti chop-chop motorcycle a nagluganan da Dangsil ken maysa a Nazer Blas, 19, baro, ken natibo met laeng iti Barangay Tiempo, Tubo, Abra, idi inabay ida ti suspek a nakaaruat iti bonete a nakalugan iti karagkarag a motorsiklo sana pinaltogan ti biktima.

Naglibas ti suspek iti amianan a direksion.

Ngem awan ti nasarakan dagiti nagresponde a polis nga ebidensia iti mapapati a nakaisayangkatan ti pammaltog.

Kasta met a saanen a nasapulan dagiti polis ti suspek nupay nangiwayatda iti hot pursuit operation.#