Estudiante, nagbekkel

BANTAY, Ilocos Sur – Insalsala daytoy estudiante ti inana bayat ti selebrasion ti kasar ti kaarrubada idi rabii ti Disiembre 25 ket awan ti panangipagarup ti ina idi naggawid iti balayda a madatnganna ti anakna nga agbitbitin iti uneg ti comfort room.

Intarayda ni Randy Impelido y Lopez, 22, naasawaan, college student, residente iti Barangay Malingeb ditoy nga ili iti Metro Vigan Cooperative Hospital ngem indeklara ti doktor a nangtaming kenkuana nga awanen ti biagna.

Sakbay ti panagbekkel ni Impelido, naggiinomda kadagiti di nainaganan a kakaduana iti balay ni Merced Lopez ket nadakamatna a “daytoy ti maudi nga pinagiinum tayun boss, isu ti kayat da jay balay”.

Idi agarup 10:00 ti rabii iti dayta met la a petsa, insala ni Impelido ti inana bayat ti selebrasion ti kasar iti kaarruba.

Kalpasanna, naggawid ni Impelido sa mapapati a nagbekkel.#