Estudiante, nakibaro tawen iti ospital gapu’t stray bullet

BANTAY, Ilocos Sur – Maysa a barito ti biktima ti naiwawa a bala maysa nga aldaw sakbay ti isasagpat ti Baro a Tawen.

Nainaganan ti biktima a ni Willy Palacpac y Paz, 14, high school student ti Ilocos Sur National High School, ken residente iti Barangay Ora, ditoy nga ili.

Iti report a dimmanon iti polis ditoy, magmagna ni Palacpac iti kalsada ti nadakamat a barangay idi agarup alas 9:58 ti rabii ti Disiembre 30, idi kellaat a nakarikna iti sakit iti makannigid a takiagna ket idi sukimatenna, nakitana laengen nga agdardara.

Segun iti biktima, awan ti nangegna a nagpaputok iti dayta a darikmat.

Iti pannakaisurat daytoy, naituding a maoperar ti biktima tapno maikkat ti bala a naikali iti takiagna.#