Estudiante, natiliw nga agikut iti paltog

STA. CATALINA, Ilocos Sur – Maysa a baro ti natiliw a nagikut iti paltog sadiay Barangay Paratong ditoy nga ili idi sardam ti Abril 13.

Natiliw nga adda ikutna a paltog ti maysa a Justine Louis Rabillas y Sta. Maria, 18, estudiante, ken residente iti Barangay Danuman, Sta. Maria, Ilocos Sur idinto a nabigbig dagiti kakaduana a da John Carl Angel y Maribale, 18, Denmar Angel y Maribale, 19, ken ni Joever Renier Angel y Escobar, 16, residenteda amin iti Brgy. Danuman East, Sta. Maria, Ilocos Sur.

Mapapati a pinaturongan ni Rabillas iti paltog a homemade revolver cal. 22 ni Adrian Rayray y Valeroso, 21, ken residente iti Barangay Paratong gapu iti naparnuay a saan a panagkikinnaawatan iti grupoda bayat ti panagay-ayamda iti basketbol.

Nagpulong ni Rayray ken ni POE Allan Ardiente a kaarrubada, ket sinurot ti polis dagiti suspek agingga iti naipiskotda.

Impaima ni Ardiente kadagiti nagresponde a polis ti paltog a nakumpiska iti ikut ni Rabillas.#