Police Report: Estudiante, natiliw nga aglaklako marijuana | Tawid News Magazine - Weekly Ilocos News 📰

Estudiante, natiliw nga aglaklako marijuana

VIGAN CITY – Maysa nga estudiante ti unibersidad iti Vigan City ti natiliwan nga aglaklako iti marijuana iti maysa a buy-bust operation nga insayangkat ti Vigan City PS, idi bigat iti Marso 5, daytoy a tawen.

Inarestar dagiti kameng ti polis ni Rusty Kevin De Leon Raquel, 24, baro, college student ken residente ti Brgy. Mabilbila Sur, Santa, Ilocos Sur, kalpasan a nangilako iti marijuana nga aggatad iti P1000 iti maysa a police asset.

Iti mismo a kaseraanna iti Brgy. Tamag, daytoy a siudad, ti nakapasamakan ti illegal nga aktibidad.

Iti panagsukisok dagiti polis iti pagkaseraan ti estudiante, nakabirokda pay iti maysa a bloke ti mapapati a napagango a marijuana a naisiled iti LBC plastic container.

Naipan ni Raquel iti Vigan CPS tapno mapilaan iti kaso a panaglabsing iti RA 9165. (Tawid News Team)