Estudiante, natupakan nagreggaay a bato

BANTAY, Ilocos Sur – Dua lawas nga awan ti klaseda sadiay Sugpon Elementary School gapu iti panagnepnepna, ket idi Hulio 19, sinapada nga agkaklasean ti nagturong iti kaserada iti poblasion para iti panagklaseda manen. Ngem saanen a nakadanon pay iti ili daytoy estudiante a balasitang agsipud ta iti dalanda, napasamak ti desgrasia a nangkeltay iti biagna.

Iti naladaw a damag manipud iti police station ti Sugpon, naireport a natupakan iti bato a nagkaruskos manipud iti bantay ni Anabelle Sicmaten y Bugtong, 13, ken residente iti Barangay Danac, Sugpon, Ilocos Sur a puon ti nakatayanna a dagus.

Kinuna ti polis ditoy a sada la naammuan ti napasamak idi inreport kadakuada ni Jayhana Venancio y Dapalog, 14, estudiante met laeng iti nadakamat a pagadalan sekundaria ken kalugaran ti biktima, ti napasamak idi agarup 6:30 ti bigat ti Hulio 21.

Segun ken ni Venancio, idi agarup alas 10:00 ti bigat ti Hulio 19, Domingo, madama a pampanurnorenda ken ni Sicmaten ti desdes iti sakaanan ti Mount Matinglin nga agturong iti kaserada iti Barangay Poblacion para iti panagklaseda manen iti kabigatanna idi nagkaruskos ti bato manipud iti bakras ti bantay agarup sangapulo a metro iti ngatuendaa ket nagtupak iti makannawan a paset ti ulo ti biktima a puon ti dagus nga ipapatayna.

Mapapati a rimmuka ti daga iti babaen ti bato a puon ti nakatebbaganna gapu iti nasurok makalawas a panagtudotudona.

Kinuna pay ni Venancio a ginuyodna ti biktima nga inyadayo iti nakatupakanna sa nagpaarayat kadagiti padada nga estudiante a magmagna iti pangaydaywen.

Immarayat dagiti barangay tanod ken kameng ti BPAT ket binagkatda ti biktima nga insubli iti pagtaenganna agsipud ta natayen.
Inreport ni Venancio iti polis ti napasamak idi napan nagbasa dua nga aldaw kalpasan ti insidente.#