Estudiante ti SPES ti Candon City, nagmula iti kayo

CANDON CITY –  Boluntario a nagmula iti kayo idi Mayo 22 iti mismo a pagbasuraan ditoy siudad dagiti estudiante a nagtrabaho iti babaen ti Special Program for the Employment of Students (SPES).

Kinuna ni Jacky Santiago, presidente dagiti 86 nga estudiante a nagtrabaho ditoy siudad iti babaen ti SPES a bukodda nga initiatibo ti panagmulada iti kayo iti sanitary landfill ti siudad a masarakan iti Barangay Balingaoan.

Programa ti gobierno ti SPES babaen ti panangilungalong ti Department of Labor and Employment (DOLE)  a pannakaiyempleo dagiti estudiante tapno agbalin a produktibo ti bakasionda bayat ti summer ken makateggedda iti kanayon a kuarta a busbosenda iti panagbasada.

Nagtrabaho dagiti estudiante iti las-ud ti makabulan ken nagsueldoda babaen ti pondo ti LGU Candon ken DOLE.#