Evidence room, maipasdek iti amin a police stations: PNP chief

VIGAN CITY – Panggep ti kabarbaro a hepe ti Philippine National Police a maipasdek kadagiti amin a police stations iti sapasap a pagilian ti maysa a kuarto a pakaurnongan amin dagiti ebidensia a narekobre dagiti inbestigador kadagiti nakapasamakan dagiti krimen.

Kinuna ni PNP Chief Director General Alan Lamadrid Purisima a kayatna a maaddaan amin a police stations iti sibubukel a pagilian iti “evidence room” tapno adda pakaidulinan ken pakapreserbaan kadagiti pammaneknek a naukkon dagiti polis iti nakapasamakan ti krimen.

Kinuna ni Purisima nga inrusatna ti pannakaipasdek iti evidence room kadagiti tunggal police station iti pagilian a pakaibodegaan ken pakapreserbaan amin dagiti ebidensia a naukkon dagiti inbestigador iti nakapasamakan ti krimen tapno saan nga “adulterated”.

Kinuna ti hepe ti PNP nga adu a kaso a kriminal ti nadismis gapu ta “adulterated” dagiti ebidensia.

Kanaig daytoy, nangidonar ni Governor Luis “Chavit” Singson iti tseke nga aggatad iti P3 million para iti pannakaipasdek ti evidence room iti police station ti San Ildefonso.

Inyawat ti gobernador ti tseke ken ni Mayor Mark Purisima, bayat ti seremonia ti pannakainagurar ti baro a police station ti nadakamat nga ili a ti PNP chief ti kangrunaan a sangaili.

Ti nasao a police station nga agpateg iti P5.15 million ti immuna a police station nga inaguraran ni Purisima manipud idi nagtugaw iti puestona.

Nagyaman ti hepe ti PNP ken ni Singson gapu iti panangsuportana iti kapolisan tapno maipaayda ti kasayaatan a serbisioda kadagiti tattao iti komunidad.

Kinuna pay ni Purisima a daytoy nga initiatibo ti lokal a gobierno iti kapolisan ket maiyannurot iti plano ti panagdur-as ken agenda ni Presidente Benigno Aquino III para iti pannakaipaay iti ekselente ken nakalidad a serbisio kadagiti tattao mainaig iti kappia ken seguridad.#