Ex-barangay captain, pinapatay armado a tattao

BURGOS, Ilocos Sur – Ginudas ti uppat nga armado a tattao ti maysa a sigud a barangay kapitan iti mismo nga uneg ti pagtaengan daytoy.

Binigbig ni Police Senior Inspector Randolf Beniat, chief of police, ti biktima a ni Romeo Dandoy, 60, mannalon, residente iti Barangay Subadi Norte, ditoy nga ili.

Kinuna ni Beniat a nakaiddan ni Dandoy tapno maturog idi simrek ti uppat a tattao iti uneg ti pagtaenganna ket pinarutupotda ti biktima babaen ti armalite rifle.

Natay nga insigida ti biktima.

Nakarekobre dagiti inbestigador iti nakapasamakan ti krimen iti 10 a kapsula ti armalite ken maysa a bala ti gauge 12 shotgun.

Kinuna ni Norma, asawa ti biktima, a mabutbutengda amangan no iraman ida a patayen dagiti kriminal. (Danny Antalan)