Executive Order a manglapped ti dengue iti Ilocos Sur, inyetnag ni Gov. Ryan Singson

VIGAN CITY — Kas sungbat ti Provincial Government iti pannakaideklarar ti sakit a dengue fever kas national epidemic iti Pilipinas, inyetnag ni Gov. Ryan Singson idi Agosto 9, 2019 ti Executive Order No. 23 a napauluan iti “Declaration of Strategic Public Health Emergency Measures to Stop the Persistence of Alarming National Dengue Fever Epidemic or Outbreak Affecting the Province of Ilocos Sur.”

Naipalaon iti EO 23 nga iti panangideklarar ti Department of Health a national epidemic ti dengue fever ket agtultuloy a pangta iti seguridad dagiti umili iti 32 nga ili ken dua a siudad ti Ilocos Sur a gapu ti makaalarma a yaadu pay dagiti kaso a nalabasannan ti “Alert Threshold Level” ket nasken a malapdan ti panagrairana.

Naipalaon iti Executive Order dagiti strategic preventive health measures. Namandar dagiti amin a mayor a bilinenda dagiti amin nga opisial ti barangay iti panangisayangkatda iti inaldaw nga Operation Taob wenno 4 o’clock Clean Up Habit kadagiti balay, ket no kasapulan mangiwayatda iti fogging, spraying and misting operations, ket agtultuloy dayta nga operasion agingga a suspensionen ti DOH ti pannakaideklarar ti national epidemic, ngem maitultuloyto latta iti tunggal Sabado iti bulan ti Hunio, Hulio ken Agosto kadagiti sumarsaruno a tawen.

Nabilin pay dagiti opisial ti Department of Education kadagiti elementary schools a mangiwayatda iti inaldaw nga Operation Taob weno 4 o’clock Clean Up Habit iti aglawlaw dagiti pagadalan; ken balakadanda dagiti pupilda nga agusar iti insect repellant kadagiti naka-exposed a paset ti bagida tapno malapdan ti pannakagatda iti lamok. Naimandar pay ti temporario a panangsuspendeda iti panagkawes iti school uniform ken agaruatda iti long-sleeve a bado, pantalon ken atiddog a medias kabayatan ti outbreak.

Naibilin met kadagiti barangay health worker ti panangbalakadda kadagiti nagannak a dagusda nga ipan ipankonsulta iti doktor wenno Rural Health Officer dagiti annakda nga agsagsagaba iti gurigor, ken liklikanda ti self-medication a pakaigapuan ti ikakaro ti sakit a puon ti pannakatay.

Maisayangkat pay ti mandatory daily reporting and surveillance dagiti kaso ti dengue manipud kadagiti pribado ken publiko nga ospital ket maisubmitarda iti tumutop nga autoridad, ken maisardengto laengen inton ideklararen ti DOH nga awanen ti outbreak. Maibalakad pay kadagiti amin a pasiente iti dengue nga agusarda iti moskitero tapno malapdan ti pannakagatda iti lamok ket masaluadan ti pannakaiwaras ti virus a puon ti sakit.

Naipalaon pay iti EO No. 23 a dagiti mayor kadagiti ili ken siudad a nakalabesen iti “Alert/Epidemic Threshold” ket mabalinda nga ideklarar ti masakupanda nga under the state of emergency tapno mausarda ti Quick Response Fund kabayatan ti kaadda ti situasion nga epidemia.

Naibilin kadagiti maseknan nga autoridad a mangisubmitarda iti report kadagiti aktibidadda iti gobernador tapno mapasardeng ti panagraira ti sakit a dengue.

Nayetnag ti Executive Order ni Gov. Singson kalpasan ti panangideklarar ti DOH ti national dengue epidemic iti Pilipinas. Idi Hulio 15, 2019, indauluan da Gov. Singson ken Dr. Trina Talaga Tabboga, Chief ti Ilocos Sur Provincial Hospital – Gabriela Silang General Hospital ti emergency meeting iti Office of the Governor a dinar-ayan dagiti hepe dagiti district hospitals, city/municipal health officers ken mayor dagiti ili ken siudad a karaman kadagiti kaaduan ti kaso iti dengue iti Ilocos Sur.

Naireport nga agingga idi Hulio 9, 2019 ket addan 723 a kaso ti dengue, ken duan dagiti natay. Naduktalan a nasurok a 95% ti immaduan ti bilang iti kaso ti dengue no maidilig iti bilang dagiti nakaptan iti daytoy a sakit manipud Enero agingga Hulio idi napalabas a tawen. Natratar iti miting dagiti aramiden ti Provincial Government ken dagiti lokal a gobierno tapno malapdan ti panagraira iti daytoy a sakit ket awanen ti mainayon a matay gapu iti dengue iti Ilocos Sur.