Footer

Expanded Senior Citizens Act, tiemponan a maipakat

Nagepekto itay Hulio 6 ti implementasion ti RA 9257 wenno Expanded Senior Citizens Act of 2003 kalpasan ti pannakaipublikar ti Implementing Rules and Regulations iti dua a nasional a pagiwarnak idi Hunio 22, 2010.

Kayatna a sawen, pagnaaranen dagiti senior citizens ti RA 9257 a mangited kadakuada iti sibubukel nga exemption iti panagbayad iti 12 porsiento nga expanded value-added tax (e-VAT).

Dakkel a pagimbagan ti maited daytoy a linteg kadagiti mapattapatta a 4.6 milion a senior citizens iti sapasap a pagilian agsipud ta maited kadakuadan ti 20% a diskuento a naipaidam kadakuada iti babaen ti immuna a linteg a pannakaipakat ti 12% value added tax kadagiti basic a tagilako, serbisio, transportasion, medisina ken dadduma pay.

Iti naan-anay a panagepekto ti expanded senior citizens, namnamaen itan dagiti lallakay ken babbaket ti kanayonan a pinansial a tulong a mangsarakuy kadakuada iti daytoy a tiempo a nakapsutdan ken awanen ti pakiteggedanda ket kadagiti nagtrabaho iti gobierno wenno iti pribado a pasdek, ti laeng bassit nga aw-awatenda a pensionda.

Sagudayen ti linteg nga exempted dagiti senior citizens iti 12% value added tax a naipataw kadagiti kangrunaan a kasapulan, kas iti medisina, plete iti bus, dyip, taksi, AUVs, shuttle servies, public railways, panagbiahe iti tangatang ken baybay ken dadduma pay a sasakayan.

Maited metten ti full PhilHealth insurance coverage kadagiti indigent a lallakay ken babbaket, libre a bakuna iti anti-flu ken anti-pneumonia ken 5 porsiento a diskuento iti danum ken koriente no la ketdi nainagan kenkuana ti metro, ken makakunsomo laeng iti nababbaba ngem 100 kilowatt-hours a koriente ken 30 cubic meters a danum iti makabulan.

Maited pay daytoy a pribiliheo kadagiti senior citizens kadagiti serbisio iti otel, panganan, pagbayad iti sine, ken dadduma pay a pagbuyaan; pumpon ken pannakaitabon.

Iti kaudian a report, madama a palpalinisen da Secretary ti DSWD Dinky Soliman ti probiso a mangited iti P500 kadagiti lallakay ken babbaket nga adda iti poverty line agraman iti diskuento iti danum ken koriente.

Mapakatan iti multa a P10,000 agingga iti P50,000 wenno pannakaibalud a saan a nababbaba ngem makabulan ken saan a nangatngato ngem innem a bulan dagiti establisimiento ken dagiti agtagikua, mangimatmaton ken personnel nga agsalungasing iti probiso daytoy a linteg.

Babaen daytoy a linteg, maatur iti dakkel a biddut nga impaay ti  linteg a nangiraman kadagiti senior citizens a mapatawan iti 12 porsiento a value added tax kadagiti medisina, tagilako ken serbisio a nagtungpal iti pannakaited laeng iti 8 porsiento kadakuada.

Maysa a landmark a linteg daytoy ket rumbeng a salakniban dagiti agilinlintegtayo tapno maited met laengen ti pammigbig kadagiti senior citizens a nagbalin a dakkel ti inannongda iti panagdur-as ti kagimongantayo idi kapigpigsaanda.#