Farm Mechanization, Pagnaaran dagiti Mannalon

Salaysay ni Jose Edwin S. Sajonia

IMPARUAR itay nabiit ti DA-LGU Cabugao ti imbentario dagiti farm equipments and machineries a naited kadagiti mannalon manipud idi tawen 2010 agingga iti agdama.

Maibatay iti rekord nga imparuar ti Municipal Agriculture Office (MHO)-Cabugao, ti sumaganad dagiti benepisiario ti Farm Mechanization Program iti DA-RFO 1, San Fernando City, La Union ken iti LGU-Cabugao:

Alina-ay Farmer’s Association; Aragan FA; Arnap FA; BACALL MPA; Baclig FA; Bato FA; Bonifacio FA; Bungro FA; Cabugao Mango Farmer’s MPA; New Cacadiran FA; Cael-layan FA; Carusipan FA; Catucdaan FA; Cuancabal FA; Cuantacla FA; Daclapan FA; Dardarat FA; Lipit FA; Maradodon FA; Marga-ay FA; Nagsantaan FA; Nagsincaoan FA; Namruangn FA; Pila FA; Pug-os FA; Quezon FA; Reppa-ac FA; Rizal FA; Rizalina FA; Sabang FA; Sagayaden FA; Salapasap FA; Salomague FA; Sisim FA; Turod FA; Turod Patac FA; Vegetable Growers; Sagayaden Free Farmers Cooperative; Pug-os 4-H Club; Turod Multipurpose Cooperative ken Arnap Sunrise MPC.

Dagiti naited a makinaria ket 4-wheeled mini-tractor, hand tractor, rice thresher, improvised pedal thresher with diesoline; water pump (gasoline, diesoline ken electric); waterhose (rolls); flatbed dryer, multipurpose drying pavement (MPDP); laminated sacks (pieces); power sprayer; plastic drum, greenhouse; palay shed, plastic crates; rice cutter; shredder; rice reaper; 2 plastic rainshelter; cold storage; warehouse, seedling tray ken plastic mulch.

Kas linaon ti inventory report, naiwaras pay dagiti waterhose – 86 rolls; laminated sacks – 272 pieces ken plastic crates – 160.
Nagtaud iti counterpart scheme iti nagbaetan ti LGU-Cabugao ken ti DA-RFO 1 iti biang dagiti recipient-associations ti kaaduan kadagiti nadakamat a ramit/makinaria a naited.

Dagitoy a benepisio a naited ket agtultuloy a pakasagrapan iti pagimbagan ken pagnam-ayan dagiti maseknan nga agindeg iti Cabugao, Ilocos Sur.
Deretso ti usar dagiti makinaria

Iti panangrugi ti panagtalon iti wet season 2014 (Hunio-Nobiembre, nayuray ti nagsasaganad a tudona kadagiti pagtatalonanda iti matapogan ti bulan ti Hunio-Hulio 2014.

Nupay kasta, saan a nagdanag dagiti adda irigasionna ken adda bubon wenno small farm reservoir-da ta nasindadaan dagiti makinaria nga impaay ti LGU-Cabugao kasta met kadagiti hose a nagsisinnublatanda nga usaren tapno mapadanumanda ti pinaraepan/naraepanda.

Daytoy ti bentahe iti kaadda ti makinaria, traktor, ken hose a kangrunaan a kasapulan iti land preparation ta malag-ananda ken maidaras ti panagtalonda nangruna no abutenda ti adda a danum a kasapulanda.

Kabayatanna, impakaammo ni Municipal Rice Program Coordinator Nereo S. Daproza nga iti kaadda ti makinaria a mausar ken iti masansan a panagtudona ket manamnama a mabassitan dagiti mannalon ti mulaanda a nangruna kadagiti rainfed area.

Dakkel ti pammati ni Daproza a babaen iti kinaregget dagiti mannalon ket mamantener ti bilang ti matalon kas iti napalabas a panagtalon iti wet season 2013 (Hunio-Nobiembre).

Panagkurri dagiti post harvest facitilities
Maysa kadagiti asosasion nga agtultuloy ti aktibidadna ket ti BACALL Multi-purpose Association iti panagoperar ti Corn Sheller, MPDP ken ti Flatbed Dryer-da iti nadaras a panangisagana iti mailako a mais (amarilio ken puraw) ta uray natapoganen ti bulan ti Hulio-Agosto 2014 ket adu pay laeng ti awatda nga agpapusi ti apitda a mais.

Imbatad ni Reynold Sabio, presidente, a daytoy ti pakakitaan nga agtultuloy ti panagmula ti tattao iti mais ta mabalin lattan ti late planting nangruna kadagiti nangangato a paset ti daga a saan a pagtalinaedan ti danum gapu iti agtultuloy a napintas a presio nga inyetnag ti gobierno probinsial babaen ken ni Gov. Ryan Luis V. Singson. Innayon ni Sabio a nupay adu met ti self-financed nga agmulmula ti mais ngem napateg kadakuada ti agtultuloy a tarabay ti gobierno munisipal ken ti probinsial kas iti Ryan Corn Program tapno saanda nga ikkaten ti P12/kilo a presio ti mais a manamnama a pakasubbotan met dagiti agmula kadaytoy a cash crop ta agapitdan iti 2-3 a bulan.

Kinuna pay ni Sabio a malaksid iti napintas a moisture content a paltuaden ti mabilag iti multi-purpose drying pavement (MPDP) ket sumursurot met ti pamagaan ti flatbed dryer (nangruna no agtudtudo) a kayatan a gatangen dagiti corn traders.

Insupusop ti presidente iti BACALL MPA a nasayaat no kastoy ta adda latta pagobraan dagiti miembroda ken manaynayonan ti matgedan ti asosasionda.

Naiyussuat dagitoy nga inisiatibo maigapu iti agtultuloy a suporta ti LGU-Cabugao ken iti gobierno probinsial agraman metten ti OPAG-Ilocos Sur ken iti DA-RFO 1 iti panagmulaan ken pannakapasayaat ti merkado ti mais iti lokalidad.#